Húftrygging fiskiskipa

Í boði eru tvenns konar skilmálar í húftryggingum fiskiskipa og geta útgerðarmenn valið sér vátryggingarvernd og eigin áhættu sem hæfir viðkomandi skipi.

Vátryggingartaki og félagið koma sér saman um vátryggingarverð skipsins í byrjun hvers vátryggingartímabils, en hámarksbætur ábyrgðartryggingar eru þó ekki hærri en kveðið er á um í 1. - 3. málsgrein 177. greinar siglingalaga númer 34/1985.

• Skipatrygging A

Vátryggingin tekur til tjóna sem verða á vátryggðu skipi og fylgifé þess, vegna skyndilegra og óvæntra óhappatilvika svo og til tjóna sem rekja má til galla í efni skips, kostnað við björgun og þátttöku í sameiginlegu sjótjóni, auk ýmiss kostnaðar sem fylgir tjónsviðgerð.
Þá tekur tryggingin til tjóns sem skipið veldur með árekstri eða á annan hátt, enda sé vátryggingartaki ábyrgur að lögum.

• Skipatrygging B

Vátrygging þessi tekur til tjóna sem verða á vátryggðu skipi og fylgifé þess, vegna skyndilegra og óvæntra óhappatilvika. Vátryggingaskilmálar eru að mörgu leyti sambærilegir og í Skipatryggingu A, en takmarkaðri ákvæði gilda meðal annars um tjón á vélum og tækjum og ekki er bættur kostnaður útgerðar við mannahald meðan á tjónsviðgerð stendur.

Hagsmunatrygging fiskiskipa

Til viðbótar við ofangreindar húftryggingar er útgerðarmanni heimilt að kaupa hagsmunatryggingu fyrir skipið til að mæta beinu eða óbeinu fjárhagslegu tjóni ef skipið ferst. Vátryggingarfjárhæðin má hæst vera 1/5 af vátryggingarverði skipsins.

Húftrygging smábáta

Vátryggingin tekur til báts og fylgifjár og er vátryggingarfjárhæð byggð á samkomulagi vátryggingartaka og félagsins. Tryggingin tekur meðal annars til tjóna ef báturinn ferst eða skemmist vegna bruna, óveðurs, strands, innbrots, jarðskjálfta og eldgosa. Í uppsátri er báturinn tryggður gegn bruna, óveðri, snjóflóðum, eldgosum og innbrotum. Þá innifelur tryggingin ábyrgðartryggingu vegna skaðabótaskyldu eiganda samkvæmt íslenskum siglingalögum.

Afla- og veiðarfæratrygging

Tryggingin tekur til tjóns sem verður á afla- og veiðarfærum ef þau farast alveg með skipinu eða stafar af því að skipið strandar, siglir á, brennur eða því hvolfir. Sé um birgðatryggingu á frystum afla að ræða tekur tryggingin einnig til tjóns sem rekja má til bilunar í kælikerfi.

Áhafnartrygging

Áhafnartryggingin er samsett trygging og innfelur þær tryggingar sem útgerðarmenn eru skyldugir að kaupa vegna áhafna sinna, samkvæmt lögum og ákvæðum kjarasamninga auk ábyrgðartryggingar útgerðarmanns.

• Ábyrgðartrygging útgerðarmanns

Vátryggingin tekur til skaðabótaábyrgðar sem fellur á vátryggðan eftir íslenskum réttarreglum vegna líkamstjóns sem rakið verður til gáleysis skipverja, vanbúnaðar eða bilunar skips, auk skemmda á munum í eigu annarra en starfsmanna eða eigenda farms eða afla er skipið flytur, enda beri atvikið að höndum um borð í skipinu eða á bryggju. Aldrei greiðast þó bætur vegna skaðabótakröfu sem vátryggður getur vátryggt sig gegn með húftryggingu hliðstæðs skips.

• Slysatrygging sjómanna, samkvæmt kjarasamningi frá 16. maí 2001

Bætur eru greiddar samkvæmt siglingalögum númer 34/1985 og ákvæðum gildandi kjarasamnings milli samtaka sjómanna og LÍÚ og tryggir sjómenn sem ráðnir eru í skipsrúm ef slys ber að höndum við vinnu í beinum tengslum við rekstur skips. Viðbótarákvæði í þessari tryggingu er að bætur slysatryggingarinnar ákvarðast eftir reglum skaðabótalaga númer 50/1993 leiði það til hærri heildarbóta en samkvæmt siglingalögum.

• Slysatrygging sjómanna, samkvæmt kjarasamningi frá 27. mars 1998

Bætur eru greiddar samkvæmt lögum númer 35/1985 og ákvæðum kjarasamnings frá 27. mars 1998 og tryggir sjómenn sem ráðnir eru í skipsrúm ef slys ber að höndum við vinnu í beinum tengslum við rekstur skips. Útgerðarmenn sem eru innan vébanda Landssambands smábátasjómanna tryggja almennt áhafnir sínar eftir þessum samningi.

• Launatrygging sjómanna

Vátryggingin greiðir bætur á samsvarandi launum sem vátryggðum ber að greiða beint til skipverja samkvæmt 36. grein sjómannalaga númer 35/1985 vegna óvinnufærni af völdum slyss eða sjúkdóms. Hægt er að velja um 3 mismunandi bótaþætti i) vinnuslys, ii) frítímaslys og iii) veikindi.

• Eigur skipverja

Tryggingin greiðir bætur vegna tjóns á eigum skipverja sem útgerðarmanni er skylt að greiða, samanber 69. grein sjómannalaga númer 35/1985 og eyðileggjast eða farast við skipstapa, eldsvoða í skipi eða annað sjótjón.

• Líftrygging sjómanna

Tryggingin greiðir sóttdauðabætur veikist skipverji um borð í skipi sínu meðan það er á siglingu og veikindin leiða hann til dauða innan tveggja mánaða.

Til viðbótar við þær tryggingar sem útgerðarmönnum er skylt að kaupa vegna áhafnar sinnar er hægt að innifela í áhafnartryggingunni víðtækari slysatryggingu sem tekur til slysa í frítíma, dagpeningatryggingu og víðtækari líftryggingu sem greiðir bætur ef viðkomandi deyr þegar hann er ráðinn í skipsrúm, en takmarkast ekki við að skip hans skuli vera á siglingu eins og gert er ráð fyrir í samningsbundnu tryggingunni.

• Frítímaslysatrygging sjómanna

Eins og nafnið gefur til kynna er hér um að ræða tryggingu sem einungis gildir í frítíma sjómanns. Það sem er sérstakt við þessa tryggingu er að líkt og í vinnuslysum sjómanna þá eru tjónbætur ákvarðaðar eftir reglum skaðabótalaga númer 50/1993. Það eru því ekki fyrirfram ákveðnar vátryggingafjárhæðir sem gilda, heldur ræðst bótaútreikningur að mestu leyti af því tekjutapi sem viðkomandi sjómaður verður fyrir. Þetta teljum við henta sjómönnum sérstaklega vel, þar sem tekjur þeirra eru afar sveiflukenndar, en þessi nálgun á bótaútreikningi kemur til móts við slíkar þarfir.

Vefþulan er vefþjónusta ætluð þeim sem einhverra hluta vegna eiga erfitt með að lesa texta af skjá