Svifaldan veitt í sjöunda sinn

21. nóv. 2017

Verðlaunagripurinn Svifaldan var veittur í sjöunda sinn á Sjávarútvegsráðstefnunni 2017 er haldin var í Hörpu 16.-17. nóvember sl. Markmiðið með verðlaununum er að efla umræður og hvetja til nýrrar hugsunar með framsæknum og frumlegum hugmyndum. Svifaldan er gefin af Tryggingamiðstöðinni, en jafnframt eru veittar viðurkenningar og fé til þeirra sem standa að þremur bestu hugmyndunum.

Það var Vilhjálmur Hallgrímsson hjá fyrirtækinu Fisheries Technologies ehf. er hlaut Svifölduna.  Verðlaunin fékk Vilhjálmur fyrir The Fisheries Manager sem er nýtt alhliða upplýsingakerfi fyrir fiskveiðistjórnun. Byggist kerfið á áratuga fjárfestingu og reynslu Íslendinga á þessu sviði en með tilkomu þess geta aðra þjóðir nú tileinkað sér íslenska þekkingu og reynslu. Fisheries Technologies hefur þróað hugbúnað sem kallast FishTech Framework og lýsir hugbúnaðurinn hvernig árangursrík fiskveiðistjórnun þ.e.a.s. gagnasöfnun, upplýsingakerfi og eftirlit, virkar. Hugbúnaðurinn lýsir innviðum fiskveiðistjórnunar og inniheldur öll upplýsingakerfi sem þarf til slíks reksturs. Að auki inniheldur hugbúnaðurinn helstu verkferla sem þörf er á innan vel útfærðar fiskveiðistjórnunar sem auðveldar þekkingaryfirfærslu. Hugmyndin felst í því að gera íslenska þekkingu á fiskveiðistjórnun
að útflutningsgrein.

Hægra megin á myndinni má sjá Vilhjálm Hallgrímsson með verðlaunagripinn Svifölduna. Við hlið hans er Hjálmar Sigurþórsson framkvæmdastjóri fyrirtækjaráðgjafar og erlendra viðskipta hjá TM.

Í öðru sæti var framúrstefnuhugmyndin Ný hagkvæm ker fyrir fersk matvæli – tvíburaker, en að henni stendur Dagur Óskarsson, Sæplast Iceland ehf. Markmiðið er að þróa ker sem minnkar til muna flutnings- og geymslukostnað á sjó og landi, varðveita gæði afurðanna jafn vel eða betur og viðhalda stöflunaröryggi miðað við núverandi ker fyrir hvítfisk og frauðkassa fyrir eldisfisk.

Í þriðja sæti var framúrstefnuhugmyndin Brakandi hollusta – Samspil fisks og kartafla á nýjan hátt, en að henni stendur Rúnar Ómarsson, VAR ehf. Afurðin er “Fish & Chips” í poka. Í pokanum, sem svipar til kartöfluflögupoka, væru 70% kartöfluflögur en 30% harðfiskur. Dúndur-hollur og bragðgóður skyndibiti í poka.

Verðlaunahafar frá vinstri: Rúnar Ómarsson VAR ehf, Vilhjálmur Hallgrímsson Fisheries Technologies og Dagur Óskarsson Sæplast Iceland ehf.