Toyota- og Lexustryggingar í samstarf við TM

31. des. 2019

Í dag kynnir Toyota á Íslandi nýja þjónustu, Toyota og Lexus ökutækjatryggingar í samstarfi við TM. Toyota- og Lexustryggingar eru hefðbundnar ökutækjatryggingar, vátryggðar af TM, og bjóðast með nýjum og notuðum Toyota og Lexus bílum hjá viðurkenndum söluaðilum. Núverandi eigendum Toyota- og Lexusbíla býðst innan tíðar að kaupa ökutækjatryggingar í gegnum sjálfvirka lausn á heimasíðum Toyota og Lexus.

Meðal þess sem Toyota- og Lexuseigendur fá með tryggingunum er bíll að láni allan þann tíma sem bíll er í viðgerð í kaskótjónum, en ekki eingöngu þá 5 daga sem í dag tíðkast. Tryggingarnar miðast við að viðgerðir séu framkvæmdar á vegum viðurkenndra þjónustuaðila Toyota á Íslandi og verður tryggt að viðurkenndir Toyota og Lexus varahlutir séu notaðir í allar viðgerðir.

Úlfar Steindórsson, forstjóri Toyota á Íslandi

 „Víða erlendis hafa bílaframleiðendur verið að ryðja sér til rúms sem öflugir seljendur ökutækjatrygginga og er okkur sönn ánægja að hafa gengið til samstarfs við TM og Toyota Insurance Management til að bjóða viðskiptavinum okkar upp á Toyota og Lexus tryggingar. Toyota býr yfir gríðarmikilli reynslu og þekkingu á sviði trygginga í gegnum samstarf og eignarhlut sinn í einu stærsta tryggingarfélagi í heimi, MS & AD Insurance Group í Japan. Toyota Insurance Management sem er í eigu tryggingararms Toyota í Evrópu – Aioi Nissay Dowa Europe – veitir samstarfinu á Íslandi ráðgjöf og stuðning. Með Toyota- og Lexustryggingum erum við enn að auka þjónustu okkar við eigendur Toyota- og Lexusbifreiða. Við teljum viðskiptavinum okkar til hagsbóta að geta gengið frá tryggingum  hjá sama fyrirtæki og það kaupir bílinn og sækir þjónustu fyrir hann.“ 

Sigurður Viðarsson, forstjóri TM

„Við erum stolt af því að Toyota hafi leitað eftir samstarfi við TM þegar ákveðið var að bjóða upp á Toyota- og Lexustryggingar á Íslandi. TM hefur undanfarin ár lagt áherslu á nýjar stafrænar þjónustuleiðir í tryggingum til að koma til móts við viðskiptavini og veita þeim framúrskarandi þjónustu. Samstarf TM og Toyota er varða á þeirri vegferð þar sem viðskiptavinir Toyota geta nú gengið frá bílatryggingunni um leið og bíllinn er keyptur.“

Söluráðgjafar hjá viðurkenndum söluaðilum Toyota og Lexus í Kauptúni, Reykjanesbæ, á Akureyri og Selfossi veita nánari upplýsingar um Toyota og Lexustryggingar.

Nánari upplýsingar má finna á toyotatryggingar.is og lexustryggingar.is