Öryggis­ráðstafanir á heimilinu

Heimilið

Hægt er að gera ákveðnar öryggisráðstafanir á heimilinu til þess að koma í veg fyrir slys sem börn verða oft fyrir. Það léttir bæði börnum og foreldrum lífið ef heimilið er öruggt. Barnið er í betri aðstöðu til að rannsaka öruggt umhverfi og foreldrar þurfa ekki að kalla boð og bönn í sífellu. Þó heimilið sé öruggt má samt aldrei sofna á verðinum.

Hér eru nokkur atriði sem ættu að hjálpa:

Er eldhúsið öruggt?

Í eldhúsinu eru rafmagnstæki, eldavél, skápar, skúffur og fleira sem barni gæti fundist spennandi.

Skúffur

Nauðsynlegt er að passa upp á skúffur svo þær klemmi ekki litla putta eða að barn sé í hættu að fá þær yfir sig. Það er annars vegar hægt að gera með því að setja á skúffurnar barnalæsingu sem hindrar að barn geti opnað þær og hins vegar að setja á skúffurnar stoppara þannig að þær dragist ekki alla leið út.

Eldavél og bakaraofn

Sniðugt er að setja hlífar fyrir hellur á eldavél sem minnkar líkurnar á að barn brenni sig á hellunum. Til að fyrirbyggja að barn grípi í potta má setja öryggisgrind framan á eldavélina. Gætið þess þó að barn sé aldrei eftirlitslaust í eldhúsi þegar heitir pottar eru á eldavélinni. Varðandi bakaraofninn er ráðlagt að setja á hann barnalæsingu svo barn geti ekki opnað hann en einnig er hægt að koma í veg fyrir að barn geti kveikt á ofninum eða stillt hitastigið með loku. Athugið að bakaraofnshurð getur orðið það heit að barn brenni sig á henni!

Rafmagnstæki

Sniðugt er að setja haldara fyrir snúrur á rafmagnstækjum, eins og t.d. rafmagnskatli, eða stytta þær til að koma í veg fyrir að barn kippi tæki eða katli yfir sig, með tilheyrandi innihaldi.

Skápar og kæliskápar

Líkt og með bakaraofninn er sniðugt að koma í veg fyrir ýmis konar slys með því að setja barnalæsingu á skápa og kæliskápa. Barn getur klemmt sig á skápahurð eða fundist leikur einn að skríða inn í skáp og/eða kæliskáp og lokast þar inni.


Er stofan og önnur herbergi örugg?

Eins og í eldhúsinu má finna skúffur og skápa í stofunni og í öðrum herbergjum. Því þarf að fara yfir stofuna og önnur herbergi og gera viðeigandi ráðstafanir til að koma í veg fyrir slysahættur.

Hillur

Hillur geta virkað sem spennandi klifurgrindur fyrir börn og því nauðsynlegt að þær séu festar vel við vegg en það kemur í veg fyrir að barn geti togað hillurnar í heild sinni yfir sig.

Hvöss horn

Í stofunni geta verið hvöss horn, s.s. á borðum og skápum, sem auðvelt er að sveipa með plasthlífum. Þó það sé ekki endilega stíllinn sem þú hafðir upphaflega í huga kemur það í veg fyrir hættuleg slys sem eru tíð þegar börn komast á skrið!

Hurðir

Ráðlagt er að koma í veg fyrir að hurðir gerist ekki slysagildrur með því að setja dempara á þær eða fleyga undir þær.

Rafmagn

Rafmagnsbúnað þarf að passa upp á um allt hús. Það er til að mynda gert með því að setja plastlok fyrir allar innstungur sem barn getur ekki losað.

Stigar

Stigar geta verið ævintýralegir í augum barna en fram að fjögurra ára aldri og jafnvel lengur geta þeir verið stórhættulegir börnum. Því er nauðsynlegt að takmarka aðgengi barna að þeim með lokuðu hliði, bæði uppi og niðri. Grindin þarf að vera að minnsta kosti 60 cm að hæð, svo það sé ekki hætta á því að barnið geti prílað yfir, og bil rimla má ekki vera meira en 7,5 cm. Ráðlagt er að kenna barni strax að skríða afturábak niður tröppur. Hættulegt getur verið ef bil er milli tröppu og uppstigs og því skal loka svo barn detti ekki þar á milli eða festi höfuð sitt þar á milli.

Útsýnisgluggar

Þegar barn er farið að skríða og príla er mikilvægt að fylgjast vel með gluggum þar sem börn geta verið fljót að príla upp og detta út. Hægt er að koma í veg fyrir slíkar slysagildrur með því að setja öryggisstormjárn á glugga sem hindrar að hægt sé að opna þá meira en 10 cm.


Er baðherbergið öruggt?

Vatnskranar og baðkar

Það getur verið sérstaklega spennandi fyrir barn að skrúfa frá krana og láta vatnið renna. Hægt er að fá vatnskrana með hitastillum til að barn geti ekki skrúfað frá brennandi heitu vatni. Hafið í huga að ekki þarf nema 10 cm djúpt vatn til að barn geti drukknað. Geymið ekki tappann í baðkarið á stað sem barnið nær til en það kemur í veg fyrir að það geti fyllt baðkarið sjálft.

Klósettið

Hægt er að passa upp á klósett með því að setja á það tvær klemmur sem hindra að barn geti opnað það sjálft.

Eiturefni

Sérstaks öryggis skal gæta ef í skápum eru hættuleg eða eitruð efni. Lyf, uppþvottaefni, hreingerningarduft, þvottaduft og fleiri slík eiturefni skulu ávallt vera í læstum skáp! Einnig er hægt að tryggja skápa sem geyma slík efni með barnalæsingu.