Persónu­vernd


Vefur TM — tm.is

Þegar þú notar vef TM verða til upplýsingar um heimsóknina og notkun vefsins. TM vinnur slíkar upplýsingar í samræmi við persónuverndarstefnu þessa.

Vefkökur og sambærileg tækni

Vefur TM notar vefkökur og sambærilega tækni sem vistast í vafra, tölvu eða snjalltæki notanda. Vefkökur eru litlar gagnaskrár sem geyma upplýsingar um notkun vefsins.

TM notar vefkökur meðal annars til að tryggja öryggi og grunnvirkni vefsins, vista stillingar, greina notkun, bæta þjónustu og notendaupplifun og, eftir atvikum, í markaðslegum tilgangi.

Vefkökur geta verið setukökur eða viðvarandi kökur. Setukökum er almennt eytt þegar vafra er lokað. Viðvarandi kökur vistast lengur í tæki notanda, þó aldrei lengur en gildistími viðkomandi köku segir til um.

Notendur geta stillt vafra sína þannig að hann hafni vefkökum eða eyði þeim. Aftenging eða eyðing vefkaka getur þó haft áhrif á virkni vefsins, notendaupplifun og vistaðar stillingar.

Tegundir vefkaka

TM kann að nota eftirfarandi flokka vefkaka:

  • Nauðsynlegar vefkökur, sem tryggja öryggi og grunnvirkni vefsins.
  • Virknikökur, sem muna val og stillingar notanda og auðvelda notkun vefsins.
  • Greiningarkökur, sem veita upplýsingar um notkun vefsins og hjálpa TM að mæla og bæta virkni hans, efni og þjónustu.
  • Markaðskökur, sem kunna að vera notaðar til að mæla árangur markaðsstarfs og birta notendum viðeigandi markaðsefni á stafrænum miðlum.

Vefmælingar

TM notar vefkökur og sambærilega tækni til að afla tölfræðilegra upplýsinga um notkun vefsins. Upplýsingarnar eru notaðar til að greina umferð, finna tækifæri til úrbóta og þróa efni, virkni og þjónustu TM.

Upplýsingar sem kunna að vera unnar í þessu sambandi eru meðal annars:

  • fjöldi notenda, heimsókna og skoðaðra síðna;
  • dagsetning og tímasetning heimsóknar;
  • hvaða síður eru skoðaðar og hvernig notandi ferðast um vefinn;
  • aðgerðir notanda á vefnum, svo sem smelltir hlekkir og notkun tiltekinna eiginleika;
  • hvaðan notandi kemur inn á vefinn, til dæmis frá leitarvél eða öðrum vef;
  • tæknilegar upplýsingar um tæki, stýrikerfi, skjástærð og tegund vafra;
  • IP-tala og gróf staðsetning sem kann að vera leidd af henni; og
  • auðkenni sem tengjast vefköku, vafralotu eða tæki.

Vefmælingum er ekki ætlað að auðkenna einstaka notendur með nafni. Upplýsingar sem safnast með vefkökum eða sambærilegri tækni geta þó eftir atvikum talist persónuupplýsingar, einkum þegar unnt er að tengja þær við tiltekið tæki, vafralotu eða einstakling.

Vefkökur og þjónustuaðilar

Sumar vefkökur eru settar af TM en aðrar kunna að vera settar af þjónustuaðilum sem TM nýtir, til dæmis vegna reksturs, greininga eða markaðssetningar. Slíkir aðilar kunna að fá aðgang að upplýsingum um heimsóknir og notkun vefsins í samræmi við hlutverk sitt og gildandi samninga.

Þegar þjónustuaðili vinnur upplýsingar fyrir hönd TM er vinnslan bundin við fyrirmæli TM og viðeigandi samninga um vinnslu og öryggi upplýsinga.

Tenglar á aðra vefi

Vefur TM kann að innihalda tengla á vefi eða þjónustu annarra aðila. Þegar notandi fer af vef TM gilda persónuverndar- og vefkökuskilmálar viðkomandi aðila. TM ber ekki ábyrgð á efni, öryggi eða meðferð persónuupplýsinga á vefjum annarra aðila.

TM ber jafnframt ekki ábyrgð á efni vefja annarra aðila sem innihalda tengla sem vísa á vef TM.

Persónuverndarstefna TM

Persónuverndarstefnu þessari er ætlað að gera grein fyrir vinnslu persónuupplýsinga hjá TM tryggingum hf., kt. 660269-3399 (hér eftir „TM“ eða „félagið“), og dótturfélagi þess, TM líftryggingum hf., kt. 630902-3040 (hér eftir „TML“), þar á meðal hvaða upplýsingar eru unnar, hvernig og í hvaða tilgangi og hvaða réttindi einstaklingar hafa. Eftirleiðis þegar vísað er til „TM“ eða „félagsins“ er átt við bæði TM og TML eftir atvikum.

TM er vátryggingafélag sem rekið er á grundvelli starfsleyfis frá Fjármálaeftirliti Seðlabanka Íslands (hér eftir „FME“). Tilgangur félagsins er að hafa með höndum hvers konar vátryggingar aðrar en líftryggingar, svo og hliðarstarfsemi sem heimil er að lögum.

TML er líftryggingafélag sem rekið er á grundvelli starfsleyfis frá FME. TML er alfarið í eigu TM og annast líftryggingastarfsemi sem samkvæmt lögum þarf að vera í sérstöku félagi. Daglegur rekstur og starfsemi TML er samkvæmt þjónustusamningi í höndum TM.

TM er ábyrgðaraðili vegna vinnslu persónuupplýsinga sem fer fram á þess vegum. TM og TML eru sameiginlegir ábyrgðaraðilar vegna vinnslu persónuupplýsinga á vegum TML.

Persónuverndarstefna þessi er liður í að tryggja að vinnsla persónuupplýsinga hjá TM sé í samræmi við ákvæði laga og reglna um persónuvernd og vinnslu persónuupplýsinga, sbr. einkum lög nr. 90/2018 um persónuvernd og vinnslu persónuupplýsinga (hér eftir „lög um persónuvernd“).

1. Um hvaða einstaklinga á vinnsla persónuupplýsinga sér stað?

1.1

Í starfsemi TM fer fram vinnsla persónuupplýsinga um einstaklinga sem má flokka með eftirfarandi hætti:

  • Væntur vátryggingartaki, þ.e. einstaklingur sem óskar eftir tilboði í vátryggingu eða einstaklingur sem félagið vill gera tilboð um vátryggingu.
  • Vátryggingartaki, þ.e. einstaklingur sem gerir einstaklingsbundinn samning eða hópvátryggingarsamning við félagið.
  • Maki og börn vátryggingartaka eða vænts vátryggingartaka.
  • Vátryggður í skaðatryggingum, þ.e. einstaklingur sem samkvæmt vátryggingarsamningum á rétt til þess að gera kröfu um bætur. Í ábyrgðartryggingum er hinn vátryggði sá sem nýtur vátryggingarverndar á skaðabótaskyldri háttsemi sinni.
  • Vátryggður í persónutryggingum, þ.e. einstaklingur hvers lífs eða heilsu vátryggingin tekur til.
  • Rétthafi, þ.e. einstaklingur sem vátryggingartaki tilgreinir í vátryggingasamningi um persónutryggingu og á rétt til að fá vátryggingarfjárhæðina greidda eftir að vátryggingaratburður hefur orðið.
  • Tjónþoli, þ.e. einstaklingur sem gerir kröfu í ábyrgðartryggingu og er annar en vátryggður.
  • Ökumaður, þ.e. einstaklingur sem er við stjórn skráningarskylds vélknúins ökutækis í árekstri eða öðru umferðaróhappi.
  • Vitni, þ.e. sá einstaklingur er veitir upplýsingar um atvik í tjónamáli.
  • Greiðandi iðgjalds, þ.e. sá einstaklingur sem greiðir iðgjald vátryggingar.
  • Kvartandi, þ.e. sá einstaklingur sem gerir athugasemd gagnvart félaginu í samræmi við reglur um eðlilega og heilbrigða viðskiptahætti vátryggingafélaga nr. 673/2017 og kvörtunarstefnu félagsins.

1.2

Hver og einn aðili getur fallið í einn eða fleiri fyrrnefndra flokka allt eftir atvikum og aðstæðum hverju sinni, eins og nánar verður gerð grein fyrir hér á eftir. Komi einstaklingur fram fyrir hönd annars einstaklings eða lögaðila á grundvelli umboðs eða annarrar lögmætrar heimildar til milligöngu í samskiptum við félagið kunna auðkennis- og samskiptaupplýsingar um þann einstakling að verða skráðar.

2. Með hvaða persónupplýsingar vinnur TM og í hvaða tilgangi?

TM safnar og vinnur ýmsar persónuupplýsingar um viðskiptavini og aðra. Mismunandi persónuupplýsingum kann að vera safnað um ólíka einstaklinga og vinnsla og söfnun persónuupplýsinga kann að fara eftir eðli þeirrar þjónustu og verkefna sem TM sinnir hverju sinni. Eftirfarandi eru dæmi um persónuupplýsingar sem félagið kann að vinna með og í hvaða tilgangi.

2.1 Tilboð í vátryggingu

Í þeim tilgangi að geta tekið ákvörðun um tilboðsgerð og gera tilboð í vátryggingu er vinnsla persónuupplýsinga nauðsynleg, en um lögmæti vinnslu má vísa til 2. töluliðar 9. gr. laga um persónuvernd.

(a) Flokkar hinna skráðu

Þeir einstaklingar sem geta átt í hlut eru væntur vátryggingartaki, maki vátryggingartaka og börn, vátryggðir og rétthafi í persónutryggingum.

(b) Tegundir persónuupplýsinga sem TM vinnur með og í hvaða tilgangi

Þær persónuupplýsingar sem félagið aflar og notar í þessu skyni eru:

  • Auðkennisupplýsingar, t.a.m. nafn og kennitala, til að áhættumeta og geta gert tilboð.
  • Samskiptaupplýsingar, t.a.m. heimilisfang, símanúmer og tölvupóstfang, til að geta átt samskipti við þá sem tilboðið snýr að.
  • Fjölskylduupplýsingar, t.a.m. hjúskaparstaða, fjöldi og aldur barna, til að áhættumeta vænt viðskipti og geta gert tilboð.
  • Viðskiptasaga, þ. á m. upplýsingar um vanskil hjá félaginu, til að áhættumeta vænt viðskipti og geta gert tilboð.
  • Tjónasaga, t.a.m. upplýsingar um eldri tjón hjá félaginu, til að áhættumeta vænt viðskipti og geta gert tilboð.
  • Vátryggðir hagsmunir, t.a.m. upplýsingar um þá hagsmuni sem njóta eiga vátryggingarverndar, s.s. um lausafé, fasteignir o.fl., ástand þeirra, verð, eiginleika o.þ.h., til að áhættumeta og geta gert tilboð.

(c) Frá hverjum TM aflar persónuupplýsinga og hvert TM miðlar þeim

Upplýsinga er aflað hjá þeim sem á í samskiptum við félagið vegna tilboðsgerðar og veiti sá persónuupplýsingar um aðra sem tengjast fyrirhugaðri vátryggingu þá gerir félagið ráð fyrir því að hann hafi leyfi þeirra til þess. Þetta á einkum við um samskiptaupplýsingar og upplýsingar um vátryggða hagsmuni. Í öllum tilvikum er upplýsinga að auki aflað frá Þjóðskrá til að staðreyna nafn, kennitölu og heimilisfang. Þá eru fjölskylduupplýsingar sóttar frá Þjóðskrá.

Ef viðskipta- eða tjónasaga vátryggingartaka, og/eða maka vátryggingartaka, er fyrir hendi hjá félaginu eru þær notaðar við áhættumat og verðlagningu. Í ákveðnum tilvikum er upplýsinga aflað frá öðrum aðilum, s.s. opinberri fasteignaskrá og ökutækjaskrá, þegar tilboð felur í sér vátryggingar á fasteign eða ökutæki þar sem nauðsynlegar og áreiðanlegustu upplýsingar er þar að finna um þessi verðmæti. Upplýsinga kann að vera aflað úr vanskilaskrá Creditinfo Lánstrausts hf. (hér eftir „Creditinfo“) í þeim tilvikum þegar viðskiptasaga vænts vátryggingartaka hjá félaginu gefur tilefni til svo að upplýsingar um greiðsluáhættu séu sem áreiðanlegastar.

(d) Sérstaklega um persónutryggingar

Þegar um er að ræða persónutryggingar (s.s. líf- og sjúkdómatryggingar) getur félagið aflað eftirfarandi upplýsinga frá vátryggðum um:

  • Líkamleg einkenni, t.a.m. upplýsingar um hæð og þyngd.
  • Hegðun, t.a.m. upplýsingar um notkun áfengis, tóbaks, lyfja og ástundun áhættuíþrótta.
  • Heilsufarssögu, t.a.m. upplýsingar um líkamlegt ástand, sjúkdóms- og slysasögu.
  • Fjölskylduheilsufarssögu, t.a.m. upplýsingar um tiltekna sjúkdóma nánustu ættingja.
  • Persónutryggingasögu, t.a.m. upplýsingar um líf- og sjúkdómatryggingasögu hjá félaginu eða öðrum vátryggingafélögum.
  • Líkamstjónasögu, t.a.m. upplýsingar um eldri líkamstjón hjá félaginu.
  • Upplýsingar sem eru nauðsynlegar til framkvæmdar áreiðanleikakönnunar á grundvelli laga um aðgerðir gegn peningaþvætti og fjármögnun hryðjuverka nr. 140/2018 og reglugerðar nr. 1240/2015 um framkvæmd áreiðanleikakannana vegna upplýsingaöflunar á sviði skattamála, s.s. upplýsingar um ríkisfang, tilgang viðskipta, uppruna fjármagns og raunverulegan eiganda fjármuna.

Þessara upplýsinga er aflað og þær notaðar í þeim tilgangi að geta metið vátryggingaráhættu. Upplýsinganna er aflað hjá vátryggðum eða með skriflegu samþykki vátryggðs. Í tilviki athugunar á líkamstjónasögu er þó upplýsinga aflað beint úr tjónakerfi TM.

2.2 Framkvæmd vátryggingarsamnings

(a) Vátryggingarsamningur kemst á

Komist samningur á um vátryggingu er vinnsla persónuupplýsinga nauðsynleg til að framkvæma efni samningsins. Það felur m.a. í sér að gefa út vátryggingaskírteini til staðfestingar á samningi, innheimta iðgjöld, endurnýja og fella niður vátryggingar, en um lögmæti vinnslu má vísa til 2. töluliðar 9. gr. laga um persónuvernd.

Komist vátryggingarsamningur á aflar félagið upplýsinga um:

  • Greiðslutilhögun, t.d. um greiðsludreifingu iðgjalds milli mánaða eða aðila.
  • Greiðslumiðlun, bankareikning eða kreditkortanúmer, vegna iðgjaldsgreiðslna.

Þessara upplýsinga er aflað hjá og tengjast greiðanda iðgjalds sem að jafnaði er einnig vátryggingartaki.

Hafi vátryggingartaki verið með sambærilega vátryggingu hjá öðru vátryggingafélagi, miðlar félagið nauðsynlegum upplýsingum til þess vátryggingafélags í því skyni að segja þeirri vátryggingu upp á grundvelli umboðs frá vátryggingartaka. Í tilviki lögmæltra brunatrygginga húseigna og ökutækjatrygginga miðlar félagið upplýsingum um töku þessara vátrygginga hjá því til opinberrar fasteigna- og ökutækjaskrár.

(b) Greiðsla iðgjalds

Við greiðslu iðgjalds verða til greiðsluupplýsingar um greiðslustöðu greiðanda hverju sinni sem nauðsynlegar eru vegna bókhalds og framkvæmdar vátryggingarsamningsins. Greiðsluupplýsingar eru jafnframt notaðar, ásamt upplýsingum um vátryggða hagsmuni, til að taka ákvörðun um og framkvæma uppgjör og eftir atvikum endurgreiðslu iðgjalda komi til þess að vátrygging er felld niður s.s. vegna uppsagnar. Vanskil á greiðslu iðgjalds geta leitt til innheimtuaðgerða af hálfu félagsins og verða þá jafnframt til upplýsingar um viðskiptasögu vátryggingartaka. Viðskiptasöguupplýsingar eru bæði notaðar í þeim tilgangi að halda utan um greiðslukröfur félagsins og við áhættumat við endurnýjun vátrygginga eða ákvörðun um viðskipti síðar. Við innheimtuaðgerðir kann að vera aflað upplýsinga úr vanskilaskrá Creditinfo í þeim tilgangi að taka ákvörðun um frekari innheimtuaðgerðir eða um greiðslusamning.

Upplýsingum um fjárhæð iðgjalds ásamt auðkennisupplýsingum er miðlað til aðila sem hafa með höndum greiðslumiðlun (t.d. banka eða kortafyrirtækis) svo unnt sé að framkvæma greiðslur í samræmi við samning aðila.

(c) Endurnýjun vátrygginga

Við endurnýjun vátrygginga er nauðsynlegt að ákvarða iðgjald fyrir næsta vátryggingartímabil á grundvelli áhættumats, en um lögmæti þeirrar vinnslu vísast til 2. töluliðar 9. gr. laga um persónuvernd.Þær persónuupplýsingar sem aflað er og notaðar eru í þessu skyni eru:

  • Auðkennisupplýsingar, t.a.m. upplýsingar um nafn og kennitölu, til að áhættumeta og geta endurnýjað.
  • Samskiptaupplýsingar, t.a.m. upplýsingar um heimilisfang, símanúmer og tölvupóstfang, til að geta átt samskipti vegna endurnýjunarinnar.
  • Fjölskylduupplýsingar, t.a.m. upplýsingar um hjúskaparstaða vátryggingartaka, fjöldi barna og aldur þeirra, til að áhættumeta og geta endurnýjað.
  • Viðskiptasaga, t.a.m. upplýsingar um vanskil hjá TM, til að áhættumeta og geta endurnýjað.
  • Tjónasaga, t.a.m. upplýsingar um tjón hjá TM, til að áhættumeta vænt viðskipti og geta endurnýjað.
  • Vátryggðir hagsmunir, t.a.m. upplýsingar um þá hagsmuni sem njóta eiga vátryggingarverndar, s.s. um lausafé, fasteignir, vátryggingarfjárhæðir, eigin áhættu o.fl., til að áhættumeta og geta endurnýjað.

Í tilviki endurnýjunar eru upplýsingar sem þegar liggja fyrir um vátryggða hagsmuni og samskiptaupplýsingar notaðar og jafnframt upplýsingar sem orðið hafa til í viðskiptasambandinu, þ.e. viðskipta- og tjónasaga. Fjölskylduupplýsingar eru sóttar í Þjóðskrá. Þeir einstaklingar sem geta átt í hlut eru vátryggingartaki, maki vátryggingartaka og börn, vátryggðir og rétthafi í persónutryggingum.

2.3 Tjónaþjónusta

TM þarf í sérhverju tjóni að fá þær upplýsingar og þau gögn sem nauðsynleg eru til að meta ábyrgð sína og eftir atvikum greiða bætur, en um lögmæti vinnslu má vísa til 2. töluliðar 9. gr. laga um persónuvernd, sem og til 6. töluliðar 1. mgr. 11. gr. sömu laga.

(a) Flokkar hinna skráðu

Þeir einstaklingar sem vinnsla persónuupplýsinga lýtur að í tjónamáli eru fyrst og fremst þeir sem gera kröfu og eiga eftir atvikum rétt til bóta, þ.e. vátryggður í skaða- og persónutryggingum, tjónþoli í ábyrgðartryggingum og rétthafi í persónutryggingum. Auk þess getur vinnsla persónuupplýsinga varðað vátryggingartaka, vátryggðan í ábyrgðartryggingum, vitni og þá sem veita félaginu upplýsingar fyrir hönd vátryggðs eða vátryggingartaka í tengslum við málið. Þegar tjónið varðar árekstur skráningarskyldra vélknúinna ökutækja eða önnur umferðaróhöpp slíkra ökutækja eru auðkennisupplýsingar um ökumann skráðar.

(b) Tegundir persónuupplýsinga sem TM vinnur með og í hvaða tilgangi

Þær persónuupplýsingar sem félagið aflar og notar í þessu skyni eru:

  • Auðkennisupplýsingar, t.a.m. upplýsingar um nafn og kennitölu.
  • Samskiptaupplýsingar, t.a.m. upplýsingar um heimilisfang, símanúmer og tölvupóstfang.
  • Vátryggðir hagsmunir, t.a.m. upplýsingar um þá hagsmuni sem njóta vátryggingarverndar, s.s. um lausafé, fasteignir, vátryggingarfjárhæð, eigin áhættu o.þ.h.
  • Tjónagögn, t.a.m. lýsing á tjónsatvikum, s.s. tjónstilkynningar, lögregluskýrslur, ljósmyndir o.fl., og gögn um umfanga tjóns, s.s. tjónsmat, verðmat, viðgerðarmat, reikningar o.fl.

Komi til greiðslu bóta eða kostnaðar er greiðslumiðlunarupplýsinga aflað svo ganga megi frá greiðslu.

(c) Frá hverjum TM aflar persónuupplýsinga og hvert TM miðlar þeim

Upplýsinga er aflað fyrst og fremst hjá þeim sem gerir kröfu um bætur og veiti sá persónuupplýsingar um aðra sem tengjast tjónamálinu gerir félagið ráð fyrir því að hann hafi leyfi þeirra til þess. Upplýsingum er eftir atvikum enn fremur aflað hjá þeim sem eiga hlut að máli, s.s. vátryggðum í ábyrgðartryggingum, vitnum eða vátryggingartaka.

Í ökutækjatjónum berst tjónsmat vegna ökutækis frá þeim viðgerðaraðila sem tjónþoli eða vátryggður hefur leitað til vegna fyrirhugaðrar viðgerðar. Við úrlausn ökutækjatjóns getur TM þurft að fletta upp skráningarnúmeri ökutækis í ökutækjaskrá til að sjá hvar ökutækið er vátryggt eða til að fá upplýsingar um eignarhald eða eftir atvikum um veðbönd til að tryggja rétt þeirra sem réttilega eiga tilkall til bóta úr ökutækjatryggingu.

Í tjónum á fasteignum getur komið til þess að könnuð er eigendaskráning í fasteignaskrá, annars vegar í þeim tilvikum þar sem vátryggingartaki og vátryggður eru ekki sami aðili til að staðreyna hvort vátryggður njóti vátryggingarverndar og í uppgjöri bóta til athugunar hvort fleiri en sá sem gerir kröfu eigi bótarétt úr vátryggingunni sem um ræðir. Í eignatjónum, bæði á lausafé og fasteignum, þar sem tjónaafgreiðsla fer fram í formi viðgerðar á hinum skemmdu verðmætum, er upplýsingum um vátryggða hagsmuni og tjónið, svo og samskipta- og auðkennisupplýsingum, miðlað til viðgerðaraðila svo hann hafi upplýsingar til að geta tekið ákvörðun um og framkvæmt viðgerð og verið í samskiptum við vátryggingartaka eða vátryggðan.

Í ferðatryggingum, þar sem vátryggingarvernd er tengd við greiðslukort einstaklings, er þörf á að fá greiðslukortaupplýsingar til að kanna hvort viðkomandi njóti vátryggingarverndar hjá félaginu og til að greiða bætur. Hvort heldur er í ferðatryggingum sem tengdar eru við greiðslukort eða ekki kann upplýsingum um vátryggða hagsmuni (þá einstaklinga eða hagsmuni sem njóta vátryggingarverndar, vátryggingarfjárhæðir, eigin áhættu o.fl.) að vera miðlað til neyðarþjónustu sem annast samskipti við hina vátryggðu sem staddir eru erlendis.

2.4 Persónutjón

Í vátryggingum þar sem bætur greiðast vegna hvers konar líkamstjóns eða andláts (s.s. líftryggingum, slysatryggingum, ábyrgðartryggingum eða sjúklingatryggingum) eða bætur tengjast heilsuskerðingu (s.s. í sjúkratryggingum) þarf félagið að fá þær upplýsingar og þau gögn sem nauðsynleg eru til að meta ábyrgð sína og eftir atvikum greiða bætur, en um lögmæti vinnslu má vísa til 2. og 6. töluliðar 9. gr. laga um persónuvernd, sem og til 6. töluliðar 1. mgr. 11. gr. sömu laga.

Þær persónuupplýsingar sem félagið aflar og notar í þessu skyni eru:

  • Auðkennisupplýsingar, t.a.m. upplýsingar um nafn og kennitölu.
  • Samskiptaupplýsingar, t.a.m. upplýsingar um heimilisfang, símanúmer og tölvupóstfang.
  • Vátryggðir hagsmunir, t.a.m. upplýsingar um þá hagsmuni sem njóta vátryggingarverndar, vátryggingarfjárhæðir, eigin áhættu o.fl.
  • Tjónagögn, t.a.m. lýsing á tjónsatviki s.s. tjónstilkynningar, lögregluskýrslur o.s.frv.

Í þeim tilgangi, hvort heldur sem er til að meta bótaskyldu eða ákvarða bætur, er í tilviki persónutjóna nauðsynlegt að afla og nota upplýsingar um:

  • Heilsufar, t.a.m. upplýsingar um áverka og heilsufarsupplýsingar fyrir og eftir slys, í tilviki slysa.
  • Heilsufarssögu, t.a.m. upplýsingar um líkamlegt ástand, sjúkdóms- og slysasögu, í líf- og sjúkdómatryggingum.

Þessara upplýsinga er aflað með samþykki þess einstaklings sem á í hlut (vátryggðs eða tjónþola) og á grundvelli þess að vinnsla er nauðsynleg vegna almannahagsmuna og lagaheimild er fyrir hendi, sbr. 1. og 7. tölulið 1. mgr. 11. gr. laga um persónuvernd.

Þessum upplýsingum er enn fremur miðlað til matsmanns eða matsmanna sem leggja mat á afleiðingar líkamstjóns í samræmi við vátryggingarsamning eða skaðabótalög nr. 50/1993 (hér eftir „skaðabótalög“). Í ferðatryggingum, þar sem vátryggingarvernd er tengd lífi og heilsu vátryggðra, er vátryggingartaki og vátryggður iðulega í beinum samskiptum við neyðarþjónustu sem þá tekur við heilsufarsupplýsingum og miðlar þeim til félagsins. Með sama hætti getur félagið þurft að miðla slíkum upplýsingum sem og um vátryggða hagsmuni til neyðarþjónustu í þeim tilgangi að meta bótaskyldu, gera ráðstafanir í tengslum við sjúkrahjálp erlendis eða til að greiða bætur.

Í því skyni að meta bótaskyldu, og eftir atvikum meta hvort vátryggingartaki eða vátryggður hafi vanrækt upplýsingaskyldu sína við töku persónutryggingar eða við tjónaafgreiðslu, getur þurft að kanna að nýju þær upplýsingar sem gefnar voru við töku persónutryggingar. Slík vanræksla á upplýsingaskyldu getur leitt til uppsagnar, niðurfalls bótaréttar eða annarra vanefndaúrræða samkvæmt lögum um vátryggingarsamninga. Um lögmæti þeirrar vinnslu vísast til 6. töluliðar 1. mgr. 11. gr. laga um persónuvernd.

Við ákvörðun bóta vegna líkamstjóns samkvæmt skaðabótalögum er nauðsynlegt að afla hjá þeim sem kröfuna gerir, þ.e. tjónþola eða vátryggðum, upplýsinga um:

  • Atvinnutekjur, t.a.m. upplýsingar um laun og starfshlutfall.
  • Frádráttarliði (örorkulífeyrisréttindi hjá lífeyrissjóði, eingreiddar örorkubætur slysatryggingar almannatrygginga o.fl. samkvæmt 4. mgr. 5. gr. skaðabótalaga).

2.5 Skráning í tjónagrunn Creditinfo Lánstrausts hf.

Tjón sem tilkynnt eru til TM, að undanskildum tjónum sem falla undir líf- og sjúkdómatryggingar, eru skráð í sérstakan tjónagrunn sem rekinn er af Creditinfo. TM telst ábyrgðaraðili í skilningi laga um persónuvernd að því er varðar skráningu félagsins á upplýsingum í grunninn og uppflettingar sem framkvæmdar eru á vegum þess. Creditinfo annast rekstur grunnsins og þjónustu við hann sem vinnsluaðili. Tilgangur með skráningu í tjónagrunninn er að vinna gegn vátryggingarsvikum og ofgreiðslu vátryggingabóta, meðal annars með því að auðvelda greiningu á því hvort sama tjónsatvik hafi verið tilkynnt til fleiri en eins vátryggingafélags án gildra ástæðna. Skráðar eru upplýsingar um tegund tjóns, nafn og kennitölu tjónþola, dagsetningu og staðsetningu tjóns, tegund tryggingar, nafn viðkomandi ábyrgðaraðila, dagsetningu skráningar í grunninn, hvort tjónið hafi verið greitt út eða ekki, númer máls hjá viðkomandi ábyrgðaraðila og eftir atvikum einkvæmt númer hins tryggða, svo sem skráningarnúmer ökutækis. Þau vátryggingafélög sem eiga aðild að tjónagrunninum og hafa gert samning um aðgang að honum geta framkvæmt uppflettingar og skráð upplýsingar í grunninn í samræmi við gildandi skilmála. Þegar uppfletting á sér stað upplýsir Creditinfo hinn skráða um það með bréfi á lögheimili og/eða með tilkynningu í Mitt Creditinfo. Upplýsingar sem skráðar eru í grunninn eru varðveittar í allt að tíu (10) ár frá skráningu.

2.6 Greiðsla bóta

Komi til greiðslu bóta eða útlagðs kostnaðar, aflar félagið greiðslumiðlunarupplýsinga (t.d. um bankareikning) svo ganga megi frá greiðslu. Auðkennisupplýsingar (nafn og kennitala) þess sem á rétt til greiðslu (vátryggðs, tjónþola eða rétthafa) og viðtakanda greiðslu sé hann annar aðili. Við greiðslu bóta eru greiðsluupplýsingar (upplýsingar um greiðslustöðu vátryggingartaka) notaðar til að ákvarða hvort félagið eigi rétt til skuldajafnaðar samkvæmt lögum um vátryggingarsamninga. Um lögmæti þeirrar vinnslu vísast til að hún er nauðsynleg til að tryggja efndir samnings 2. töluliðar 9. gr. laga um persónuvernd.

Upplýsingum um fjárhæð greiðslukröfu ásamt auðkennisupplýsingum er miðlað til aðila sem hafa með höndum greiðslumiðlun (t.d. banka eða kortafyrirtækis) svo unnt sé að framkvæma greiðslur í samræmi við samning aðila.

2.7 Endurkröfur

Með greiðslu bóta úr vátryggingu getur félagið öðlast rétt til að endurkrefja annan aðila um greiðsluna að öllu leyti eða að hluta, ýmist á grundvelli laga (s.s. skaðabótalaga eða laga um ökutækjatryggingar) eða vátryggingarsamnings. Um lögmæti slíkrar vinnslu má vísa til 6. töluliðar 9. gr. og 6. töluliðar 1. mgr. 11. gr. laga um persónuvernd.

Þeir aðilar sem endurkrafa er gerð á hendur og persónuupplýsinga er miðlað til í tengslum við endurkröfuna eru:

  • Annað vátryggingafélag.
  • Sá sem valdið hefur tjóni og/eða ber skaðabótaábyrgð á því.
  • Sjúkratryggingar Íslands.

Vegna endurkröfu á hendur þeim sem talinn er hafa valdið bótaskyldu tjóni af ásetningi eða stórkostlegu gáleysi samkvæmt lögum um ökutækjatryggingar er félaginu skylt að beina kröfunni til endurkröfunefndar sem starfar á grundvelli laga um ökutækjatryggingar og kveður á um hvort beita skuli endurkröfurétti. Um aðgang nefndarinnar að gögnum vísast til 21. gr. reglugerðar um ökutækjatryggingar nr. 1244/2019.

Í þeim tilgangi að sá sem endurkrafan beinist að geti metið ábyrgð sína og greiðsluskyldu miðlar félagið til hans persónuupplýsingum vegna tjóns sem endurkrafan á rót sína að rekja til og hann á rétt til, en þess er gætt að upplýsingarnar séu viðeigandi og ekki umfram það sem nauðsynlegt er hverju sinni.

Hafi viðgerð verið framkvæmd á íbúðarhúsnæði sem hluti af tjónaafgreiðslu gerir félagið kröfu um endurgreiðslu á virðisaukaskatti til Skattsins eins og lög um virðisaukaskatt leyfa og er þá auðkennisupplýsingum um vátryggðan og reikningum vegna framkvæmda miðlað til Skattsins.

2.8 Samskipti við endurtryggjendur

TM, líkt og aðrir sem hafa með höndum svokallaða frumvátryggingastarfsemi, er rétt og skylt að endurtryggja starfsemi sína hjá endurtryggjendum m.a. í samræmi við það sem lög um vátryggingastarfsemi nr. 100/2016 kveða nánar á um. Í þeim tilgangi að taka ákvörðun um endurtryggingu, iðgjöld og endurnýjun endurtryggingar er miðlað til endurtryggjanda eða eftir atvikum endurtryggingamiðlara TM persónuupplýsingum um vátryggingartaka og vátryggða er varða:

  • Auðkennisupplýsingar, t.a.m. upplýsingar um nafn og kennitölu.
  • Vátryggða hagsmuni, t.a.m. upplýsingar um þá hagsmuni sem njóta vátryggingarverndar, s.s. um líf eða heilsu vátryggðs eða um efnisleg verðmæti, s.s. skip eða fasteignir, vátryggingarfjárhæð o.þ.h.

Um lögmæti miðlunar vísast til 6. töluliðar 9. gr. laga um persónuvernd.

Geri TM kröfu á hendur endurtryggjanda vegna tjóna sem félagið hefur haft til meðferðar þarf í þeim tilgangi að miðla til endurtryggjanda þeim persónuupplýsingum sem félaginu sjálfu er nauðsynlegt að afla til að meta bótaskyldu sína og ákvarða bætur (sjá kafla um tjónaþjónustu). Um lögmæti miðlunar vísast til 6. töluliðar 1. mgr. 11. gr. laga um persónuvernd.

2.9 Markaðsstarfsemi

Í þeim tilgangi að afla nýrra viðskipta og kanna ánægju núverandi viðskiptavina TM hefur félagið, eða aðrir á vegum félagsins frumkvæði að samskiptum við núverandi viðskiptavini og einstaklinga sem félagið vill fá í viðskipti og til þess að svo verði fer fram vinnsla persónuupplýsinga, en um lögmæti hennar vísast til 6. töluliðar 9. gr. laga um persónuvernd.

(a) Flokkar hinnar skráðu

Þeir einstaklingar sem vinnsla persónuupplýsinga fer fram gagnvart eru væntur vátryggingartaki, maki hans og börn.

(b) Tegundir persónuupplýsinga sem TM vinnur með og í hvaða tilgangi

Þær persónuupplýsingar sem félagið aflar og notar í þessu skyni eru auðkennisupplýsingar, samskiptaupplýsingar, fjölskylduupplýsingar, viðskiptasaga og tjónasaga, allt í þeim tilgangi að áhættumeta vænt vátryggingaviðskipti og eiga samskipti.

  • Auðkennisupplýsingar, t.a.m. upplýsingar um nafn og kennitölu, til að áhættumeta vænt vátryggingaviðskipti.
  • Samskiptaupplýsingar, t.a.m. upplýsingar um heimilisfang og símanúmer, til að geta átt samskipti.
  • Fjölskylduupplýsingar, t.a.m. upplýsingar um hjúskaparstöðu vænts vátryggingartaka, fjöldi og aldur barna þeirra, til að áhættameta vænt vátryggingaviðskipti.
  • Viðskiptasaga til að áhættumeta vænt vátryggingaviðskipti.
  • Tjónasaga, t.a.m. upplýsingar um eldri tjón hjá félaginu, til að áhættumeta vænt vátryggingaviðskipti.

Hafi einstaklingur verið skráður á svokallaða bannskrá Þjóðskrár Íslands, sem er skrá yfir þá sem andmælt hafa því við Þjóðskrá að nöfn þeirra séu notuð í markaðsstarfsemi, fer frekari vinnsla ekki fram. Sama gildir ef viðkomandi er bannmerktur í símaskrá í samræmi við fjarskiptalög.

(c) Frá hverjum TM aflar persónuupplýsinga og hvert TM miðlar þeim

Upplýsingar um auðkenni, heimilisfang og fjölskyldu eru sóttar í Þjóðskrá. Upplýsingar um símanúmer eru sóttar í opinbera símaskrá en upplýsingar um viðskipta- og tjónasögu hjá TM, ef þær eru fyrir hendi, eru fengnar úr upplýsingakerfum félagsins.

2.10 Gæði þjónustu og kvartanir

Í þeim tilgangi að þróa og bæta þjónustu sína fer fram vinnsla persónuupplýsinga, en um lögmæti vísast til 6. töluliðar 9. gr. laga um persónuvernd. Þannig geta þeir sem átt hafa í samskiptum við félagið vegna vátryggingaviðskipta eða tjónaafgreiðslu (vátryggingartaki, vátryggður, tjónþoli) fengið senda beiðni um að taka þátt í þjónustukönnun en við þá vinnslu eru notaðar auðkennis- og samskiptaupplýsingar. Svör við þjónustukönnunum eru hins vegar ópersónugreinanleg.

Þeir sem eiga eða átt hafa í viðskiptum við félagið geta komið kvörtun (hvers kyns athugasemd um óánægju með þjónustu, afgreiðslu mála eða hvernig hefur verið staðið að viðskiptasambandi) á framfæri við félagið í samræmi við reglur Fjármálaeftirlits Seðlabanka Íslands nr. 353/2022 um eðlilega og heilbrigða viðskiptahætti, samskipti við viðskiptavini og meðhöndlun kvartana. Samkvæmt þeim reglum ber félaginu að varðveita upplýsingar um kvartanir og meðhöndlun þeirra í að lágmarki fimm (5) ár en við úrlausn kvörtunar getur þurft hverju sinni að afla persónuupplýsinga úr upplýsingakerfum félagsins.

2.11 Rafræn vöktun

TM viðhefur rafræna vöktun með viðskiptavinum sínum með eftirfarandi hætti.

(a) Myndavélavöktun

Á starfsstöð TM að Kalkofnsvegi 2, 101 Reykjavík, eru inngangar vaktaðir með eftirlitsmyndavélum sem beinast að svæði þar sem er gengið inn á skrifstofur TM og ná til viðskiptavin og annarra sem um inngangana fara. Viðskiptavinir TM kunna jafnframt að sækja þjónustu í húsnæði Landsbankans að Reykjastræti 6, þar sem myndavélar eru við afgreiðslur. Þær eftirlitsmyndavélar sem eru í húsnæði Landsbankans eru á forræði bankans og geta einstaklingar sem óska eftir upplýsingum um þá vöktun og/eða vilja nýta réttindi sín samkvæmt persónuverndarlögum kynnt sér persónuverndarstefnu Landsbankans

Myndavélavöktun fer fram á grundvelli lögmætra hagsmuna félagsins í tengslum við eigna- og öryggisvörslu, sbr. 6. tölul. 1. mgr. 9. gr. laga um persónuvernd.

(b) Hljóðupptaka símtala

TM hljóðritar eftirfarandi símtöl starfsmanna við viðskiptavini. Viðskiptavinum er tilkynnt um hljóðupptöku í upphafi símtals:

  • Öll símtöl sem berast frá aðilum utan TM í símkerfi félagsins.
  • Öll símtöl til aðila utan TM sem berast úr símkerfi félagsins. Það sama gildir um símtöl sem berast úr símkerfi TM í GSM númer starfsmanna félagsins.
  • Símtöl sem berast í neyðarnúmer félagsins (s: 800-6700).

Hljóðupptaka símtala og varðveisla annarra samskipta er geta geymt viðskiptafyrirmæli fer fram til þess að fullnægja skyldum sem FME leggur á félagið sem eftirlitsskyldan aðila til þess að varðveita öll samskipti er geyma viðskiptafyrirmæli. Um lögmæti vinnslunnar vísast því til að hún er nauðsynleg vegna lagaskyldu, sbr. 3. tölul. 1. mgr. 9. gr. laga um persónuvernd.

3. Gervigreind

3.1       

TM nýtir gervigreind í starfsemi sinni s.s. við ákvörðun og uppgjör tjónamála, til að auka skilvirkni, öryggi og gæði þjónustu. Gervigreind er meðal annars nýtt til að flýta úrvinnslu mála, styðja við ákvarðanatöku starfsmanna og í sjálfvirkum svörunarkerfum í samskiptum við viðskiptavini. Gervigreind kann að vera innbyggð í upplýsingakerfi og hugbúnaðarlausnir sem TM nýtir í innri starfsemi sinni. Slíkar lausnir geta verið þróaðar af félaginu sjálfu eða veittar af þriðju aðilum. Félagið leggur áherslu á að notkun gervigreindar hafi ekki neikvæð áhrif á gæði þjónustu eða réttindi viðskiptavina.

3.2          

TM tryggir að öll vinnsla persónuupplýsinga með aðstoð gervigreindar fari fram í samræmi við lög um persónuvernd. Um lögmæti vinnslunnar vísast eftir atvikum til 6. töluliðar 9. gr. og 2. töluliðar 9. gr. laga um persónuvernd. Til að tryggja örugga og ábyrgða meðferð gagna hefur félagið gripið til nauðsynlegra tæknilegra og skipulegra öryggisráðstafana í tengslum við gervigreind sem eru notuð í starfseminni.

3.3         

TM hefur sett sér skýrar verklagsreglur um notkun gervigreindar og hefur einsett sér að nýta þessa tækni með ábyrgum, gagnsæjum og siðferðilegum hætti. Það felur í sér reglulegt eftirlit og endurskoðun á þeim kerfum sem félagið nýtir, þannig að notkun þeirra sé ávallt í samræmi við gildi félagsins og væntingar viðskiptavina.

4. Miðlun persónuupplýsinga til þriðju aðila

4.1          

TM kann að miðla persónuupplýsingum til þriðja aðila, þ.m.t. til þjónustuveitenda, vátryggingaumboðsmanna og annarra samstarfsaðila. Miðlun persónuupplýsinga til þriðju aðila getur átt sér stað í mismunandi tilgangi, svo sem til að efna samning, sinna þjónustu, uppfylla lagaskyldu, vegna lögmætra hagsmuna eða af annarri nauðsyn. Sem ábyrgðaraðili ber TM ábyrgð á því að vinnsla persónuupplýsinga, bæði sú sem félagið framkvæmir sjálft og sú sem vinnsluaðilar framkvæma, samrýmist ákvæðum laga um persónuvernd.

4.2          

Öll vinnsla persónuupplýsinga af hálfu þriðju aðila byggist á skriflegum samningi. Félagið velur einungis þriðju aðila sem veita nægilegar tryggingar fyrir því að þeir geri viðeigandi tæknilegar og skipulagslegar ráðstafanir til að vinnslan uppfylli kröfur laga og að réttindi skráðra einstaklinga séu tryggð.

4.3          

Starfsmenn TM, vinnsluaðilar, samstarfsaðilar og aðrir sem fá aðgang að persónuupplýsingum eru bundnir þagnarskyldu um þau atriði sem þeir fá vitneskju um í starfi sínu og leynt skulu fara samkvæmt lögum, fyrirmælum eða eðli máls.

4.4          

Ef persónuupplýsingar eru fluttar út fyrir Evrópska efnahagssvæðið tryggir félagið að slík miðlun fari fram á grundvelli viðeigandi heimilda í persónuverndarlöggjöfinni. Þær heimildir geta meðal annars verið eftirfarandi: (i) ákvörðun framkvæmdastjórnar ESB um fullnægjandi vernd viðkomandi þriðja lands samkvæmt 45. gr. GDPR; (ii) staðlaðar samningsákvæðar framkvæmdastjórnar ESB (Standard Contractual Clauses) eða bindandi fyrirtækjareglur (Binding Corporate Rules) ásamt viðeigandi viðbótarráðstöfunum; eða (iii) í undantekningartilvikum, undanþágur samkvæmt 49. gr. GDPR, til dæmis ef flutningurinn er nauðsynlegur til að stofna, hafa uppi eða verja réttarkröfu. Félagið grípur jafnframt til viðeigandi öryggisráðstafana til að tryggja vernd persónuupplýsinga við flutning.

5. TM og Landsbankinn

5.1          

Í því skyni að veita viðskiptavinum TM heildstæða þjónustu sem mætir þörfum þeirra, vinnur félagið náið með Landsbankanum hf., kt. 471008-0280 (hér eftir „Landsbankinn“). TM og Landsbankinn hafa gert með sér útvistunarsamning, samkvæmt hverjum Landsbankinn tekur að sér að veita félaginu og viðskiptavinum þess ákveðna þjónustu, svo sem móttöku fyrirspurna, hýsingu gagna, upplýsingatækni, afgreiðslu erinda og sölu og dreifingu trygginga. Til þess að gera Landsbankanum kleift að sinna þeirri þjónustu sem þessir samningar kveða á um, er persónuupplýsingum miðlað á milli aðila. Í þeim tilvikum sem Landsbankinn er vinnsluaðili að slíkri vinnslu persónuupplýsinga liggur vinnslusamningur til grundvallar vinnslunni. Í þeim tilvikum þegar félagið og Landsbankinn ákveða sameiginlega tilgang vinnslunnar og aðferðir við hana teljast þeir sameiginlegir ábyrgðaraðilar eða eftir atvikum sjálfstæðir ábyrgðaraðilar eftir því hvernig m.a. ákvörðun um vinnslu er háttað.

5.2          

TM og Landsbankinn kunna að miðla á milli sín persónuupplýsingum ýmist á grundvelli laga, til að efna samninga við viðskiptavini, vegna lögmætra hagsmuna félagsins, Landsbankans eða þriðja aðila, enda vegi réttindi einstaklinga og hagsmunir ekki þyngra, eða á grundvelli samþykkis sem hefur verið veitt. Miðlun persónuupplýsinga getur t.d. átt sér stað vegna sölu og dreifingar trygginga, þjónustu í netbanka/appi Landsbankans, vildarflokka, markaðssetningar eða annarra þjónustuþátta sem útvistun nær til.

5.3          

Sameiginlegir viðskiptavinir félagsins og Landsbankans kunna að njóta sérkjara og/eða fríðinda hjá báðum aðilum. Til þess að geta veitt sérkjör og/eða fríðindi miðlar félagið upplýsingum til Landsbankans á grundvelli lögmætra hagsmuna, svo sem nafni og kennitölu. Athygli er vakin á að viðskiptavinir geta andmælt vinnslunni með því að senda tölvupóst á netfangið personuvernd@tm.is.

5.4          

TM kemur fram sem sameiginlegur ábyrgðaraðili með Landsbankanum í þeim tilvikum sem sala á tryggingum fer fram hjá Landsbankanum. Þá hefur félagið gert samning við Landsbankann um að bankinn birti m.a. tryggingayfirlit í netbanka og appi Landsbankans í þeim tilgangi að sameiginlegir viðskiptavinir geti haft yfirsýn yfir sín fjármál og tryggingar á einum stað.

5.5          

TM og Landsbankinn kunna að standa saman að því að birta sameiginlegt markaðsefni og koma þá fram sem sameiginlegir eða sjálfstæðir ábyrgðaraðilar vegna slíkrar vinnslu. Slík notkun persónuupplýsinga í markaðssetningartilgangi byggist á  samþykki viðskiptavinar. Viðskiptavinir eiga rétt á að hafna notkun persónuupplýsinga  í markaðssetningartilgangi og geta dregið samþykki til baka hvenær sem er með því að breyta stillingum í netbanka/appi Landsbankans, senda tölvupóst á personuvernd@landsbankinn.is eða á personuvernd@tm.is.

5.6          

Öll miðlun persónuupplýsinga fer fram með viðeigandi tæknilegum og skipulagslegum öryggisráðstöfunum. Tryggt er að viðtakendur séu bundnir þagnarskyldu um upplýsingarnar og þær séu ekki notaðar í öðrum tilgangi en miðlun þeirra gaf tilefni til.

5.7          

Um vinnslu persónuupplýsinga hjá Landsbankanum má sjá í persónuverndaryfirlýsingu á heimasíðu Landsbankans.

6. Varðveislutími

6.1         

Persónuupplýsingar eru varðveittar eins lengi og nauðsynlegt er miðað við tilgang hverrar vinnslu. Varðveislutíminn kann því að vera breytilegur eftir tegund upplýsinga og tilgangi vinnslu. Helstu viðmið um varðveislutíma eru eftirfarandi: Persónuupplýsingar sem tengjast vátryggingarsamningi eða tjóni eru varðveittar í a.m.k. þann tíma sem nauðsynlegur er til að stofna, hafa uppi eða verja réttarkröfu. Bókhaldsgögn eru varðveitt í sjö (7) ár samkvæmt lögum um bókhald. Samskipti sem geymt geta viðskiptafyrirmæli eru varðveitt í að minnsta kosti fimm (5) ár vegna lagaskyldu. Upplýsingar í tjónagrunni Creditinfo eru varðveittar í allt að tíu (10) ár frá skráningu. Heilsufarsupplýsingar sem aflað er vegna persónutjóna eru varðveittar á meðan þeirra kann að vera þörf vegna réttarkröfu. Upplýsingar sem varða markaðsstarfsemi eru varðveittar á meðan viðskiptasamband varir eða þar til samþykki er afturkallað, eftir því sem við á. Upptökur úr eftirlitsmyndavélum eru að hámarki geymdar í 90 daga. Að varðveislutíma liðnum er persónuupplýsingum eytt eða þær gerðar ópersónugreinanlegar.

7. Réttindi þín

7.1          

Lög um persónuvernd og vinnslu persónuupplýsinga veita einstaklingum ákveðin réttindi.

7.2          

Samkvæmt persónuverndarreglum á sérhver einstaklingur rétt á að fá staðfestingu frá félaginu hvort verið sé að vinna persónuupplýsingar er varða hann sjálfan og ef svo er, rétt til aðgangs að persónuupplýsingunum og hvernig vinnslunni er hagað.

7.3          

Einstaklingur á rétt á að fá óáreiðanlegar upplýsingar er varða hann sjálfan leiðréttar og að ákveðnum skilyrðum uppfylltum að TM eyði persónuupplýsingum er hann varða. Að uppfylltum ákveðnum skilyrðum á einstaklingur rétt til þess að TM takmarki vinnslu persónuupplýsinga um hann. Þegar vinnsla hefur verið takmörkuð skal einungis vinna slíkar persónuupplýsingar, að varðveislu undanskilinni, með samþykki viðkomandi eða til að stofna, hafa uppi eða verja réttarkröfu eða til að vernda réttindi annarra.

7.4          

Einstaklingur hefur að ákveðnum skilyrðum uppfylltum rétt til andmæla vinnslu persónuupplýsinga, sem hefur þá þýðingu að vinnsla sem annars hefði farið fram, fer ekki fram. Einstaklingur getur ávallt andmælt vinnslu sem unnin er í þágu beinnar markaðssetningar.

7.5          

Að ákveðnum skilyrðum uppfylltum á einstaklingur rétt á því að ekki sé tekin ákvörðun er hann varðar eingöngu á grundvelli sjálfvirkrar gagnavinnslu, þ.m.t. gerðar persónusniðs og hefur hann þá rétt til mannlegrar íhlutunar og að véfengja ákvörðunina.

7.6          

Að ákveðnum skilyrðum uppfylltum á einstaklingur rétt til að fá persónuupplýsingar, er varða hann sjálfan, fluttar til annars ábyrgðaraðila, s.s. annars vátryggingafélags.

7.7          

Þegar vinnsla byggir á samþykki einstaklings á hann rétt til að draga samþykki sitt til baka hvenær sem er, án þess að það hafi áhrif á lögmæti vinnslu á grundvelli samþykkisins fram að afturkölluninni.

7.8          

Einstaklingur hefur ávallt rétt til að kvarta undan meðferð TM á persónuupplýsingum hans til Persónuverndar en nánari upplýsingar um stofnunina má finna á vefslóðinni www.personuvernd.is.

7.9          

Einstaklingur getur gætt réttinda sinna með þeim hætti sem tilgreint er í kafla 10.1 hér að neðan. Félagið verður við beiðnum um nýtingu réttinda á kostnaðarlausan hátt, nema beiðni sé tilefnislaus, óhófleg eða ef farið er fram á afhendingu fleiri en eins afrits af persónuupplýsingum. Nauðsynlegt er að einstaklingur sanni á sér deili þegar hann óskar eftir að neyta réttinda sinna.

8. Öryggisbrestur

8.1

Með öryggisbresti við meðferð persónuupplýsinga er átt við brest á öryggi sem leiðir til óviljandi eða ólögmætrar eyðingar persónuupplýsinga, eða þess að þær glatist, breytist, verði birtar eða aðgangur sé veittur að þeim í leyfisleysi. Komi upp öryggisbrestur ber félaginu að tilkynna um hann til Persónuverndar án ótilhlýðilegrar tafar og eigi síðar en innan 72 klst. eftir að vart hefur orðið við brestinn, nema ólíklegt þyki að bresturinn leiði af sér mikla áhættu fyrir réttindi og frelsi einstaklinga. Í slíkum tilvikum er viðkomandi einstaklingi tilkynnt um öryggisbrestinn.

9. Sjálfvirk ákvarðanataka

9.1          

TM getur stuðst við sjálfvirk ferli sem getur falið í sér ákvarðanatöku á grundvelli persónusniðs. Hafi sjálfvirk ákvarðanataka áhrif á hagsmuni þína átt þú rétt á að koma á framfæri athugasemdum eða andmælum og gera kröfu um mannlega íhlutun. Dæmi um sjálfvirka ákvarðanatöku í starfsemi TM er meðal annars sjálfvirk útgáfa tiltekinna trygginga. Sjálfvirk ákvarðanataka getur m.a. byggst á gervigreind, sjá nánar kafla 3.

10. Samskiptaupplýsingar

10.1

Fyrirspurnum og erindum vegna persónuverndar og meðferð persónuupplýsinga er m.a. unnt að koma á framfæri með tölvupósti á netfangið personuvernd@tm.is eða með pósti á eftirfarandi heimilisfang:

TM tryggingar hf.

Reykjastræti 6

101 Reykjavík

B.t. persónuverndarfulltrúa TM