Stjórnarhátta­yfirlýsing

Fylgni við lagakröfur og leiðbeiningar um góða stjórnarhætti

Stjórnarhættir TM eru í samræmi við lög og stjórnvaldsfyrirmæli sem um félagið gilda, s.s. lög um ársreikninga nr. 3/2006, lög um hlutafélög nr. 2/1995 og lög um vátryggingastarfsemi nr. 100/2016. Einnig grundvallast stjórnarhættir félagsins á ýmsum stjórnvaldsfyrirmælum, t.d. reglugerðum, reglum og tilmælum útgefnum af Fjármálaeftirliti Seðlabanka Íslands. Auk þess byggja stjórnarhættir TM á margvíslegum stefnum og reglum sem félagið hefur sett sér, þ. á m. stefnu um hæfi og hæfni stjórnar, forstjóra og lykilstarfsmanna, áhættustefnu, stefnu um innra eftirlit, stefnu um innri endurskoðun, stefnu um tryggingastærðfræði og stefnu um útvistun.

Landsbankinn hf. (hér eftir „Landsbankinn“ eða „bankinn“), móðurfélag TM, hefur sett stefnu um stjórnarhætti samstæðu Landsbankans. Það er stefna Landsbankans að samstæðan sé rekin á traustan og faglegan hátt í samræmi við lög og reglur, gildandi viðmið um góða stjórnarhætti og eigendastefnu ríkisins fyrir fjármálafyrirtæki. Markmið stefnunnar er að félög í samstæðu bankans eigi góð samskipti og árangursríkt samstarf með vönduðum og opnum stjórnarháttum sem eru yfir gagnrýni hafnir.

TM fylgir í starfsemi sinni leiðbeiningum um stjórnarhætti fyrirtækja, sem gefnar eru út af Viðskiptaráði Íslands, Nasdaq Iceland og Samtökum atvinnulífsins, nú 6. útgáfu. Leiðbeiningarnar eru aðgengilegar á vefsíðunni www.leidbeiningar.is. Enn fremur fylgir félagið leiðbeiningum EIOPA um stjórnarhætti, sem og viðmiðunarreglum EBA um stjórnarhætti fjármálafyrirtækja, eins og við getur átt fyrir TM sem dótturfélag í vátryggingastarfsemi. Leiðbeiningar EIOPA um stjórnarhætti eru aðgengilegar á heimasíðu EIOPA, www.eiopa.europa.eu/index_en. Viðmiðunarreglur EBA eru aðgengilegar á heimasíðu EBA www.eba.europa.eu/homepage.

TM víkur frá leiðbeiningum um stjórnarhætti fyrirtækja að nokkru leyti vegna ástæðna sem eru einkum að rekja til eignarhalds félagsins, þ.e. Landsbankinn er aðal eigandi TM. Vikið er frá leiðbeiningunum að því leyti að tilnefningarnefnd er ekki starfrækt í félaginu og hluthöfum er ekki gert kleift að taka þátt í hluthafafundi rafrænt. Af sömu ástæðum þykir ekki tilefni til opinberrar birtingar tiltekinna upplýsinga um hluthafafundi og framboð til stjórnar.

Stjórn hefur ekki sett sérstaka stefnu um fjölbreytileika í tengslum við stjórn, framkvæmdastjórn og æðstu stjórnendur, en í stefnu TM um hæfi og hæfni stjórnar, forstjóra og lykilstjórnenda er ítarlega fjallað um mat á hæfi og orðspori, auk þess sem samþykktir félagsins kveða á um að ætíð skuli tryggt að hlutfall hvors kyns í stjórn sé ekki lægra en 40%. Hjá félaginu er lögð áhersla á jafnrétti og fjölbreytni. Á vinnustaðnum er hver einstaklingur metinn að verðleikum og skal hafa jafna möguleika og sömu réttindi í starfi og til starfsþróunar. Hvers konar mismunun, bein eða óbein, vegna kyns, kynþáttar, þjóðernisuppruna, trúar, lífsskoðana, fötlunar, skertrar starfsgetu, aldurs, kynhneigðar, kynvitundar, kyneinkenna eða kyntjáningar, er ekki liðin.

Starfsemi TM, stefna og framtíðarsýn

TM á rætur sínar að rekja til ársins 1956 þegar félagið var stofnað af aðilum tengdum sjávarútvegi. Félagið býður upp á alhliða vöruúrval fyrir einstaklinga og fyrirtæki, en þær helstu eru ökutækja-, eigna-, sjó-, ábyrgðar-, slysa- og líftryggingar. TM hefur starfsleyfi á EES svæðinu og í Færeyjum.

Í dag er TM, ásamt dótturfélögunum TM líftryggingum hf. og Íslenskri endurtryggingu hf. hluti af samstæðu Landsbankans.

Haustið 2023 mótuðu stjórn og framkvæmdastjórn TM stefnu félagsins til næstu fimm ára. Gildi TM eru: Framsýnt, hugrakkt, einfalt og traust og tilgangur félagsins er að gera viðskiptavinum kleift að vaxa og dafna, og að grípa þá þegar áföll verða.

Stefna félagsins var ítruð í ársbyrjun 2026 m.t.t. þeirra breytinga sem hafa orðið á eignarhaldi félagsins. Það er markmið TM að vera með ánægðustu viðskiptavinina á Íslandi, verðmætasta viðskiptavinastofninn og öflugan vöxt.

Stjórn

Samsetning og starfsemi stjórnar

Stjórn TM fer með æðsta vald í málefnum félagsins milli hluthafafunda. Stjórnin skal hafa hagsmuni félagsins, hámörkun á langtímaarðsemi hluthafa og rekstur í samræmi við eðlilega og heilbrigða viðskiptahætti og venjur í vátryggingaviðskiptum, með hag vátryggingartaka og vátryggðra fyrir augum, að leiðarljósi í störfum sínum. Stjórn hefur með höndum almennt eftirlit með rekstri félagsins, með sérstöku tilliti til þess að starfsemi félagsins er að hluta til útvistað til Landsbankans.

Stjórn félagsins skal skipuð fimm aðilum, tveimur til vara, og skulu stjórnarmenn fullnægja öllum þeim skilyrðum, þ. á m. hæfisskilyrðum, sem kveðið er á um lögum. Ætíð skal tryggt að hlutfall hvors kyns í stjórn sé ekki lægra en 40%. Stjórnin fundar að jafnaði mánaðarlega og ekki sjaldnar en á tveggja mánaða fresti.

Tilnefningarnefnd

Eins og áður er getið starfar ekki tilnefningarnefnd hjá félaginu. Eitt meginhlutverk slíkrar nefndar er að vinna að hagsmunum allra hluthafa og gefa hluthöfum kost á að koma sjónarmiðum sínum á framfæri í tilnefningarferlinu.

Í ljósi eignarhalds á félaginu eiga helstu sjónarmið að baki skipan tilnefningarnefnda ekki við, en stjórn félagsins metur árlega í sjálfsmati hvaða hæfni stjórnarmenn þurfa að búa yfir til að sinna málefnum félagsins og hvernig samsetningu og fjölbreytni stjórnar er háttað.

Starfsreglur stjórnar

Stjórn félagsins hefur sett sér ítarlegar starfsreglur sem hafa að markmiði að ákvarða verkaskiptingu stjórnar sem og önnur störf hennar og samskipti, m.a. í þeim tilgangi að koma í veg fyrir hagsmunaárekstra í starfsemi félagsins, auka trúverðugleika og stuðla að óhlutdrægni við meðferð og afgreiðslu mála.

Starfsreglurnar eru aðgengilegar á heimasíðu félagsins, TM.is.

Fjöldi stjórnarfunda og mæting

Stjórn félagsins fundaði alls 18 skipti á árinu 2025. Fullskipað var á stjórnarfundum í 16 skipti, einn stjórnarmaður forfallaðist í tvö skipti.

Árangursmat stjórnar

Árlegt mat stjórnar á störfum sínum hefur það að markmiði að bæta vinnubrögð og auka skilvirkni. Auk þess að meta eigin störf er lagt mat á frammistöðu forstjóra, stjórnarformanns og undirnefnda stjórnar. Utanaðkomandi aðila getur verið falið að gera rafræna könnun og taka viðtöl við hlutaðeigandi og skila niðurstöðum í skýrslu til stjórnarformanns.

Í árangursmati stjórnar leggur stjórn mat á stærð, samsetningu, verklag og starfshætti stjórnar. Einnig skal yfirfara og meta þróun félagsins og hvort hún sé í samræmi við markmið þess. Í slíku mati leggur stjórn m.a. mat á styrkleika og veikleika í störfum sínum og verklagi og hugar að því sem hún telur að betur megi fara í störfum sínum. Árangursmat stjórnar var síðast framkvæmt í desember 2024.

Upplýsingar um stjórnarmenn

Ásta Þórarinsdóttir, formaður stjórnar

Ásta tók sæti í stjórn TM 2025. Hún er með B.Sc. gráðu í hagfræði frá Háskóla Íslands, M.Sc. gráðu í fjárfestingastjórnun frá Cass-háskóla í Bretlandi og hefur auk þess lokið prófi í verðbréfamiðlun. Hún var stjórnarformaður Fjármálaeftirlitsins á árunum 2014-2019 og í fjármálaeftirlitsnefnd Seðlabanka Íslands 2020-2024. Hún stofnaði ásamt öðrum Eva Consortium og Sinnum heimaþjónustu árið 2008. Hún var framkvæmdastjóri Eva Consortium til ársins 2020, framkvæmdastjóri Sinnum 2009-2014 og stjórnarformaður félagsins 2014-2024. Ásta bættist í eigendahóp Yoga & Heilsu árið 2020 og hefur verið eini eigandi og framkvæmdastjóri frá 2023. Ásta hefur setið í ýmsum öðrum stjórnum og nefndum, m.a. í stjórn Nýsköpunarsjóðs atvinnulífsins, Jökla Verðbréfa og ISB Holding.

Ásta er óháð félaginu, daglegum stjórnendum og stórum hluthöfum félagsins. Ásta er fædd árið 1970.

Helgi Bjarnason, varaformaður stjórnar

Helgi tók sæti í stjórn TM 2025. Hann er með meistaragráðu í tryggingastærðfræði frá Köbenhavns University og með viðurkenningu Seðlabanka Íslands til að sinna tryggingafræðilegum athugunum í starfsemi lífeyrissjóða. Helgi var forstjóri Vátryggingafélags Íslands 2017-2023. Á árunum 2010-2017 var hann framkvæmdastjóri hjá Arion banka og þar áður var hann aðstoðarforstjóri Sjóvá-Almennra trygginga hf. og framkvæmdastjóri líftryggingastarfseminnar. Helgi hefur setið í stjórn Félags íslenskra tryggingastærðfræðinga, Lífís, Okkar líftrygginga, Samtaka atvinnulífsins, Samtaka fyrirtækja í fjármálaþjónustu og Sambandi íslenskra tryggingafélaga.

Helgi starfaði sem ráðgjafi fyrir Landsbankann 2023-2025 og telst því ekki óháður stórum hluthöfum. Innri stefnum, reglum og ferlum TM um armslengdarsjónarmið, hagsmunaárekstra og skjölun ákvarðana er ætlað að tryggja að stjórnarseta hans skapi ekki hættu á hagsmunaárekstrum. Helgi er fæddur árið 1969.

Hreiðar Bjarnason

Hreiðar Bjarnason tók sæti í stjórn TM 2025. Hann er framkvæmdastjóri Fjármála Landsbankans og staðgengill bankastjóra. Hreiðar er viðskiptafræðingur frá Háskóla Íslands, með M.Sc. gráðu í fjármálafræðum frá London Business School og hefur lokið prófi í verðbréfaviðskiptum. Hreiðar hóf störf í Landsbanka Íslands hf. árið 1998, fyrst sem sérfræðingur í Markaðsviðskiptum og síðar í Fjárstýringu. Hreiðar tók við sem framkvæmdastjóri Markaða og fjárstýringar Landsbankans hf. snemma árs 2010. Hann tók við starfi framkvæmdastjóra Fjármálasviðs Landsbankans árið 2012. Hreiðar hefur m.a. setið í stjórnum Tryggingasjóðs innstæðueigenda og fjárfesta, Framtakssjóðs Íslands og Eyrir Invest.

Hreiðar situr í framkvæmdastjórn Landsbankans, móðurfélags TM, og telst því ekki óháður stórum hluthöfum. Innri stefnum, reglum og ferlum TM um armslengdarsjónarmið, hagsmunaárekstra og skjölun ákvarðana er ætlað að tryggja að stjórnarseta hans skapi ekki hættu á hagsmunaárekstrum. Hreiðar er fæddur árið 1973.

Inga Björg Hjaltadóttir

Inga Björg var fyrst kjörin í stjórn TM í apríl 2021. Hún er sviðsstjóri starfsfólks og skipulags hjá Cowi. Inga útskrifaðist með Cand. Jur. gráðu frá Háskóla Íslands árið 1995 og hlaut héraðsdómslögmannsréttindi árið 2003. Hún er einn stofnenda Attentus, mannauður og ráðgjöf, og starfaði hjá félaginu 2007-2024, síðustu ár sem framkvæmdastjóri, auk þess að sinna ráðgjöf og lögmannsstörfum. Inga var meðeigandi í Lögfræðistofu Reykjavíkur 2016-2020 og hefur starfað sem lögmaður frá árinu 2003. Áður var Inga deildarstjóri hjá Eimskip 1999-2003, lögfræðingur og síðar staðgengill starfsmannastjóra Reykjavíkurborgar á árunum 1996-1999. Inga hefur áður setið í stjórnum Carbon Recycling International, Límtrés Vírnets, E-Farice og Smellins eignarhaldsfélags. Hún var einnig áður nefndarmaður í endurskoðunarnefnd Reykjavíkurborgar, Orkuveitu Reykjavíkur, Strætó BS, Malbikunarstöðvarinnar Höfða, Faxaflóahafna, Sorpu, Félagsbústaða og Slökkviliðs höfuðborgarsvæðisins. Þá var hún formaður kjaranefndar Reykjavíkurborgar og hefur setið í tilnefningarnefnd Festi frá 2004, formaður frá 2025.

Inga er einnig dómari í Félagsdómi f.h. íslenska ríkisins, tilnefnd af fjármálaráðherra. Inga var jafnframt stundakennari í alþjóða viðskiptarétti við Háskólann á Bifröst árin 2004-2011, auk þess sem hún sinnti kennslu í lögfræði fyrir nemendur í fjármálaverkfræði við Háskólann í Reykjavík árin 2005-2008 og tilfallandi stundakennslu við sama skóla og Opna háskólann.

Inga Björg er óháð félaginu, daglegum stjórnendum og stórum hluthöfum félagsins. Inga Björg er fædd árið 1970.

Þorvarður Sveinsson

Þorvarður var fyrst kjörinn í stjórn TM í apríl 2021. Hann er framkvæmdastjóri Farice og starfaði áður sem framkvæmdastjóri hjá Sýn. Þorvarður hefur reynslu sem framkvæmdastjóri, yfirmaður stefnumótunar og fjárfestingastjóri og hefur gegnt stjórnarstörfum í fjölda fyrirtækja á Íslandi og á Norðurlöndum, m.a. í Lýsingu, Lyfju, Símanum, Mílu, Öryggismiðstöð Íslands, Símanum Danmark og Vodafone Færeyjum.

Þorvarður er með M.Eng. gráðu í verkfræði frá Harvard University og B.SC. í rafmagns- og tölvuverkfræði frá Háskóla Íslands.

Þorvarður er óháður félaginu, daglegum stjórnendum og stórum hluthöfum félagsins. Þorvarður er fæddur árið 1977.  

Upplýsingar um varamenn í stjórn

Varastjórn félagsins er skipuð þeim Bjarka Má Baxter, lögmanni, og Söru Pálsdóttur, framkvæmdastjóra samskipta og menningar hjá Landsbankanum.

Undirnefndir stjórnar

Endurskoðunarnefnd

Samsetning og starfsemi endurskoðunarnefndar
Endurskoðunarnefnd skal skipuð a.m.k. þremur aðilum sem skulu allir vera óháðir endurskoðanda eða endurskoðendum félagsins. Meiri hluti nefndarmanna skal jafnframt vera óháður félaginu og daglegum stjórnendum þess. Stjórnarmenn félagsins, sem teljast óháðir í skilningi leiðbeininga um stjórnarhætti fyrirtækja, teljast jafnframt óháðir nefndarmenn í framangreindum skilningi. Auk þess skal einn nefndarmanna, sem bæði er óháður daglegum stjórnendum og félaginu, vera óháður stórum hluthöfum. Formaður nefndarinnar skal vera óháður öllum framangreindum aðilum.

Endurskoðunarnefnd TM er ætlað að sinna ráðgjafar- og eftirlitshlutverki fyrir stjórn félagsins, m.a. við að tryggja gæði ársreikninga og annarra fjármálaupplýsinga og tryggja óhæði endurskoðunar félagsins. Nefndin hefur eftirlit með vinnuferli við gerð reikningsskila, virkni innra eftirlits, störfum innri og ytri endurskoðunar, auk þess að setja fram tillögu til stjórnar um val á endurskoðanda eða endurskoðunarfyrirtæki.

Í endurskoðunarnefnd sitja stjórnarmennirnir Þorvarður Sveinsson, formaður nefndarinnar, Hreiðar Bjarnason og Inga Björg Hjaltadóttir.

Starfsreglur endurskoðunarnefndar
Stjórn TM hefur sett endurskoðunarnefnd ítarlegar starfsreglur sem hafa að markmiði að skilgreina hlutverk nefndarinnar og kveða á um verklagsreglur, réttindi og skyldur nefndarmanna. Með reglunum er almenn umgjörð nefndarinnar reglubundin til að skýra verksvið hennar gagnvart stjórn og stuðla að vandaðri málsmeðferð í þeim málum sem heyra undir nefndina.

Starfsreglur endurskoðunarnefndar eru aðgengilegar á heimasíðu félagsins, TM.is.

Fjöldi funda og mæting
Endurskoðunarnefnd TM fundaði alls tíu skipti á árinu 2025. Fullskipað var á öllum fundum.

Árangursmat endurskoðunarnefndar
Endurskoðunarnefnd skal a.m.k. árlega skila skýrslu um störf sín til stjórnar félagsins. Í skýrslu stjórnar skulu koma fram upplýsingar um samskipti nefndarinnar við stjórn, endurskoðendur og starfsmenn félagsins. Þá skal gerð grein fyrir eftirliti nefndarinnar með vinnuferli við gerð reikningsskila, virkni innra eftirlits, innri endurskoðun og áhættustýringu. Einnig skal gerð grein fyrir eftirliti nefndarinnar með endurskoðun ársreiknings félagsins og mati á óhæði endurskoðenda.

Endurskoðunarnefnd ber að framkvæma árangursmat á störfum nefndarinnar, einstakra nefndarmanna og samsetningu nefndarinnar eigi sjaldnar en árlega og upplýsa stjórn um niðurstöður matsins.

Árangursmat endurskoðunarnefndar var síðast framkvæmt í desember 2024.

Áhættunefnd

Samsetning og starfsemi áhættunefndar
Áhættunefnd skal skipuð a.m.k. þremur aðilum, þar af að lágmarki tveimur stjórnarmönnum félagsins. Nefndarmenn skulu búa yfir nægilegri þekkingu og starfsreynslu til að móta áhættustefnu og áhættuvilja félagsins.

Áhættunefnd er ætlað að sinna ráðgjafar- og eftirlitshlutverki fyrir stjórn félagsins, m.a. vegna mótunar áhættustefnu og áhættuvilja. Nefndin hefur eftirlit með fyrirkomulagi og virkni áhættustýringar, rekstraráhættu, orðsporsáhættu og annarri áhættu eftir því sem tilefni er til. Áhættunefnd er hluti af innra eftirliti TM og sinnir yfirferð á gögnum innra eftirlits áður en þau eru lögð fyrir stjórn eða eftir atvikum endurskoðunarnefnd félagsins.

Í áhættunefnd sitja stjórnarmennirnir Helgi Bjarnason, formaður nefndarinnar og Þorvarður Sveinsson, ásamt Bergsteini Ó. Einarssyni.

Starfsreglur áhættunefndar
Stjórn hefur sett áhættunefnd ítarlegar starfsreglur þar sem fjallað er um hlutverk og verkefni nefndarinnar.

Starfsreglur áhættunefndar eru aðgengilegar á heimasíðu félagsins, TM.is.

Fjöldi funda og mæting
Áhættunefnd TM fundaði alls tólf skipti á árinu 2025. Fullskipað var á níu fundum, einn nefndarmaður forfallaðist í þrjú skipti.

Árangursmat áhættunefndar
Áhættunefnd skal a.m.k. árlega skila skýrslu um helstu viðfangsefni nefndarinnar á starfsárinu til stjórnar félagsins. Nefndinni ber að framkvæma árangursmat á störfum sínum, einstakra nefndarmanna og samsetningu nefndarinnar eigi sjaldnar en árlega og upplýsa stjórn um niðurstöður matsins.

Nefndin skal gera tillögur til stjórnar varðandi álitaefni sem nefndin hefur orðið vör við í tengslum við ábyrgðarsvið sitt og telur að ættu að koma til skoðunar hjá stjórn félagsins.

Árangursmat áhættunefndar var síðast framkvæmt í desember 2024.

Starfskjaranefnd

Samsetning og starfsemi starfskjaranefndar
Starfskjaranefnd skal skipuð þremur stjórnarmönnum og skal meirihluti nefndarmanna vera óháður félaginu og daglegum stjórnendum þess. Formaður stjórnar skal sitja í nefndinni og jafnframt vera formaður hennar.

Starfskjaranefnd er ætlað að sinna ráðgjafar- og eftirlitshlutverki fyrir stjórn félagsins, m.a. varðandi starfskjör stjórnar, undirnefnda stjórnar og æðstu stjórnenda félagsins.

Í starfskjaranefnd sitja stjórnarmennirnir Ásta Þórarinsdóttir, formaður nefndarinnar, Helgi Bjarnason og Inga Björg Hjaltadóttir.

Starfsreglur starfskjaranefndar
Stjórn hefur sett starfskjaranefnd starfsreglur þar sem fjallað er um hlutverk og verkefni nefndarinnar.

Starfsreglur starfskjaranefndar eru aðgengilegar á heimasíðu félagsins, TM.is.

Forstjóri TM

Birkir Jóhannsson hóf störf sem forstjóri TM í apríl 2023. Birkir gegndi áður stöðu framkvæmdastjóra kjarnastarfsemi og stafrænna lausna hjá VÍS. Áður en hann hóf störf hjá VÍS starfaði Birkir m.a. hjá Birti Capital Partners, Valitor, Arion banka og Lögmönnum Höfðabakka.

Birkir er með embættispróf í lögfræði frá Háskóla Íslands og meistaragráðu í fjármálum fyrirtækja frá Háskólanum í Reykjavík. Auk þess hefur Birkir lokið prófi í verðbréfaviðskiptum og aflað sér réttinda sem héraðsdómslögmaður. Þá lauk hann á árinu 2023 AMP gráðu frá IESE Business School. Birkir er fæddur árið 1983.

Forstjóri annast daglegan rekstur félagsins og skal í þeim efnum fara eftir þeirri stefnu og fyrirmælum sem stjórn félagsins hefur gefið. Hann fer með ákvörðunarvald í öllum málefnum félagsins í samræmi við stefnu, markmið, áhættuvilja og mörk samkvæmt ákvörðun stjórnar.

Forstjóri skal leggja gagnrýnið mat á tillögur, skýringar og upplýsingar sem fyrir hann eru lagðar við ákvarðanatöku og skal einungis taka ákvarðanir að vel upplýstu máli. Ákvörðunarvald forstjóra nær til allra málefna sem ekki eru öðrum falin með lögum, samþykktum félagsins eða ákvörðun stjórnar. Hinn daglegi rekstur tekur ekki til ráðstafana sem eru óvenjulegar eða mikilsháttar.

Forstjóra ber að sjá til þess að meðferð eigna og rekstur félagsins sé í samræmi við stefnu félagsins, lög, reglur og góða viðskiptahætti og forstjóri innleiðir og starfrækir skilvirkt innra eftirlitskerfi í samræmi við ákvörðun stjórnar.

Framkvæmdastjórn TM

Samsetning, starfsemi og upplýsingar um framkvæmdastjóra

Framkvæmdastjórn TM er, ásamt forstjóra, skipuð fjórum.

Björk Viðarsdóttir, framkvæmdastjóri tjónaþjónustu

Sviðið annast þjónustu til allra viðskiptavina félagsins vegna tjóna.

Björk var síðast framkvæmdastjóri þjónustu TM og þar áður lögfræðingur tjónaþjónustu félagsins. Björk útskrifaðist með embættispróf frá lagadeild Háskóla Íslands og hefur lokið málflutningsprófi fyrir héraðsdómi. Hún sat í stjórn Símans 2021-2024.

Garðar Þ. Guðgeirsson, framkvæmdastjóri stefnu og áhættu

Sviðið ber ábyrgð á gagna- og tölfræðigreiningum TM ásamt stofnstýringu, áhættustýringu, tryggingastærðfræði og vöruþróun.

Garðar var áður forstöðumaður stefnumótunar hjá samstæðu Kviku og framkvæmdastjóri hjá TM 2008-2021. Hann er með B.Sc. gráðu í rafmagnsverkfræði, M.Sc. í hugbúnaðarverkfræði og MBA gráðu.

Hjálmar Sigurþórsson, framkvæmdastjóri sölu og ráðgjafar

Ráðgjöf og sala annast ráðgjöf, þjónustu og sölu til einstaklinga og fyrirtækja ásamt heildsölusamstörfum TM, markaðsmálum og viðskiptaumsjón.

Hjálmar gegndi síðast stöðu framkvæmdastjóra vátryggingasviðs TM. Hann hefur starfað hjá félaginu frá árinu 1988, fyrst sem starfsmaður í tjónaþjónustu en síðar framkvæmdastjóri hennar. Hjálmar er með MBA gráðu frá Háskólanum í Reykjavík.

Óskar B. Hauksson, framkvæmdastjóri fjármála og rekstrar

Sviðið ber ábyrgð á verkefnastjórn ásamt útvistun fjármála og upplýsingatækni.

Óskar var síðast framkvæmdastjóri fjármála og stafrænna lausna TM og þar áður framkvæmdastjóri rekstrarsviðs TM. Hann er rafmagnsverkfræðingur með B.Sc. í tölvunarfræði frá Háskóla Íslands og með MBA gráðu frá Oxford, Said Business.

Skipurit

Eftirfarandi skipurit tók gildi hjá TM í júní 2025:

Innra eftirlit og áhættustýring

Innra eftirlit

TM leggur áherslu á að vera til fyrirmyndar og að viðskiptavinir upplifi félagið sem traust vátryggingafélag. Til að ná markmiðum sínum tekur félagið aðeins áhættu sem það skilur, getur metið og mætt. Virkt innra eftirlit er einn af hornsteinum öflugrar áhættustjórnunar og á að stuðla að því að félagið starfi í samræmi við áhættustefnu og áhættuvilja.

Innra eftirlit er ferli sem mótast af stjórn félagsins, stjórnendum þess og starfsfólki. Það felur í sér allar þær aðgerðir sem gripið er til með það að markmiði að styðja við, stjórna, takmarka eða vakta tiltekna starfsemi og auka þannig líkur á að félagið nái settum markmiðum. Meðal þátta sem teljast til innra eftirlits er stjórnskipulag, ábygðarskipting, stefnur, reglur, ferlar, vinnulýsingar, staðlar, kerfi, spár, áætlanir, skýrslur og ýmis búnaður.

Meginþætti innra eftirlits má greina í eftirlitsumhverfi, áhættumat, eftirlitsaðgerðir, upplýsingar og samskipti, og stjórnendaeftirlit. Þessir meginþættir eru samofnir öllum starfsþáttum félagsins.

Stjórn ber að tryggja að komið sé á virku kerfi innra eftirlits, það sé í samræmi við stærð, eðli og umfang rekstursins og tryggi viðeigandi yfirsýn yfir starfsemi félagsins. Stjórn TM fær árlega skýrslu um virkni innra eftirlits, helstu viðfangsefni, mat á styrk og veikleika þess skipulags sem eftirlit lýtur að, og úrbótatillögur eftir því sem tilefni kann að gefast. Þegar ábyrgð á framkvæmd innra eftirlits er falin tilteknum starfseiningum eða stjórnendum innan félagsins skal það gert með formlegum hætti og á þann hátt að enginn vafi leiki á hvar ábyrgðin liggur.

Framkvæmd innra eftirlits má aðgreina eftir framkvæmd og því hverjir framkvæma það, í svokallaðar varnarlínur.

Í fyrstu varnarlínu eru starfsfólk og stjórnendur en þeim ber að tryggja að áhættustjórnun og innra eftirlit sé órjúfanlegur hluti af daglegri starfsemi félagsins. Starfsmenn framkvæma eftirlitsaðgerðir í sínum daglegu störfum og stjórnendum ber að hafa eftirlit með skilvirkni þeirra aðgerða og upplýsa um virkni þeirra.

Í annarri varnarlínu eru sérstakar eftirlitseiningar svo sem regluvarsla, áhættustýring, öryggisstjóri, fjármálastjóri, lögfræðiráðgjöf, persónuverndarfulltrúi og trygginga-stærðfræðingur en hlutverk þeirra er að móta innra eftirlitskerfi félagsins með því að setja fram tillögur að stefnum og aðferðafræði á sviði innra eftirlits sem er í samræmi við stefnumörkun félagsins og þau lög og reglur sem um starfsemina gilda. Þessar eftirlitseiningar styðja við innleiðingu á samþykktum stefnum og aðferðafræði á sviði innra eftirlits, fræða starfsmenn og sannreyna og staðfesta að starfsmenn fylgi stefnum og reglum félagsins.

Í þriðju varnarlínu eru óháðar eftirlitseiningar svo sem Innri endurskoðun, ytri endurskoðendur og aðrir óháðir eftirlitsaðilar. Hlutverk þeirra er að staðfesta virkni bæði fyrsta og annars stigs eftirlits, veita ráðgjöf um það sem betur má fara og þannig leggja mat á virkni áhættustjórnunar, eftirlitsaðgerða og stjórnarhátta félagsins.

Áhættustýring

Stjórn TM er ábyrg fyrir því að tryggja að áhættum félagsins sé stýrt á viðeigandi hátt. Stjórnin setur áhættustefnu TM sem inniheldur meðal annars áhættuvilja félagsins og setur grundvallarstefnumið fyrir áhættustjórnun. 

Í áhættustefnunni er lagður grundvöllur að stefnumörkun, hagnaðarmarkmiðum og almennu áhættustigi og fjárhagsstyrk TM og dótturfélaga. Innan ramma þessara grundvallarstefnumiða og leiðbeininga sníða dótturfélögin hvert fyrir sig sína eigin áhættustefnu með tilliti til sérstöðu þeirrar starfsemi sem það sinnir.

Framkvæmd áhættustýringar
Öflug áhættustýring gerir félagið betur í stakk búið til að takast á við og minnka líkur á óvæntum atburðum sem komið geta í veg fyrir að TM nái markmiðum sínum. Einstök starfssvið bera ábyrgð á daglegri áhættutöku í starfseminni í samræmi við þær stefnur, reglur og heimildir sem settar hafa verið.

Forsendur þess að stuðlað sé að skilvirkri áhættustjórnun innan TM eru meðal annars:

• Skýrt stjórnskipulag áhættustjórnunar, ábyrgðaskipting á milli mismunandi starfssviða og starfseininga og skýr heimildarmörk innan þeirra.
• Eigin áhættustefna, undirstefnur og leiðbeiningar sem í heild sinni ná yfir alla áhættu félagsins.
• Að verðmöt, áhættumælingar og skýrslugjöf sé gerð með skynsömum og viðeigandi hætti. 

Áhættustýring TM starfar í samræmi við áhættustefnu sem samþykkt er af stjórn. Í stefnunni er áhættustýringarferli félagsins, hlutverk og verkefni skilgreind.

Stjórn og stjórnendur stýra áhættu félagsins í samræmi við áhættuvilja TM, sem inniheldur áhættumörk sem félagið stefnir á að vera innan. Áhættustýring fylgist með og mælir áhættu og upplýsir stjórn félagsins í ársfjórðungslegum áhættuskýrslum hvort áhættutaka og gjaldþol sé innan áhættumarka stjórnar.

Eftirfarandi þættir eru grunnþættir í skilvirkri og heildstæðri áhættustýringu TM:

• Koma auga á áhættur
• Greining og mat á áhættum
• Mat á fjármagnsþörf
• Stýring og viðbrögð við áhættu
• Eftirlit með stýringum
• Skýrslugjöf

Lykilmarkmið áhættustýringar eru: 

• að tryggja að komið sé auga á áhættur sem hafa áhrif á arðsemi, þær greindar og stöðugt mældar,
• að tryggja að fjármögnun, í formi gjaldþols og fyrirsjáanlegrar arðsemi, sé fullnægjandi miðað við þá áhættu sem er í starfseminni og núverandi viðskiptaumhverfi,
• að styðja stjórn og stjórnendur í eftirlitshlutverki sínu, m.a. með því að  greina og leita leiða til að stýra þeim mælanlegu áhættuþáttum sem geta haft bein fjárhagsleg áhrif á afkomu TM. 

Langtímamarkmið er að lágmarka líkurnar á að áhætta verði að veruleika sem og að lágmarka skaðlegar afleiðingar áhættu. Þess vegna leitast áhættustjórnun við að samræmi sé á milli ávinnings og áhættu í starfsemi félagsins út frá viðskiptastefnu þess og að tryggja að áhættutaka félagsins sé í takt við markmið þess, áhættusækni og fjárhagslegan styrk.

Árangursrík áhættustýring felur í sér samkeppnisforskot í gegnum betur upplýstar stefnumótandi ákvarðanir og viðskiptaákvarðanir. Annar ávinningur sem áhættustýring færir er bætt fylgni við reglur, nákvæmari fjárhagsskýrslugerð og að tryggja styrk og þol TM.

Skýrslugerð áhættustýringar
Skýrslugjöf um áhættur er mikilvægur liður í skilvirkri áhættustýringu til að stjórn TM fái góða mynd af áhættum félagsins.

Áhættustýring TM sinnir áhættumati, hefur yfirumsjón með útreikningum á gjaldþolskröfum og upplýsir stjórn í ársfjórðungslegum áhættuskýrslum hvort áhættutaka og gjaldþol sé innan áhættumarka stjórnar. 

Kjarninn í áhættustýringu TM er eigið áhættu- og gjaldþolsmat (ORSA) sem er heildstætt áhættumat félagsins. ORSA matið skiptist í sex undirverkþætti sem ætlað er að meta allar áhættur félagsins. Almennt er litið á ORSA sem samfellt ferli með daglegum breytingum en sum ferli eru þó framkvæmd annað hvort árlega eða ársfjórðungslega.

Einu sinni á ári, hið minnsta, tekur TM saman helstu niðurstöður ORSA áhættumats félagsins saman í eina samantektarskýrslu sem í  daglegu tali er nefnd ORSA skýrsla (e. Own Risk and Solvency Assessment supervisory report).

Regluvarsla

Í starfsemi sinni ber TM að hlíta margslungnu regluverki á sviði laga og margs konar stjórnvaldsfyrirmæla sem og eigin innri reglum.  TM er ljóst mikilvægi þess að fara í einu og öllu að lögum og reglum og að starfsemi þess sé rekin í samræmi við eðlilega og heilbrigða viðskiptahætti og venjur í þeirri starfsemi sem fram fer innan félagsins. 

Í lögum um vátryggingastarfsemi er mælt fyrir um að vátryggingafélag skuli hafa regluvörslu og að starfssvið regluvörslu feli í sér ráðgjöf til stjórnar um fylgni við lögin, reglur og önnur stjórnvaldsfyrirmæli á grundvelli þeirra. Einnig skuli regluvarsla meta áhrif lagabreytinga á starfsemi vátryggingafélags ásamt því að meta hlítingaráhættu.

Hlutverk regluvörslu er einnig að vera stjórnendum og starfsmönnum innan handar með fræðslu og hvers konar aðstoð og ráðgjöf er lýtur að reglufylgni.  Hún hefur almennt eftirlit með því að fylgt sé lögum og reglum, þ. á m. innri reglum. Þá fylgist hún með að nauðsynlegar stefnur og ferlar séu til staðar og að inntaki þannig að starfsemin sé í hvívetna í samræmi við lög og reglur svo og með setningu og breytingum á settum lögum sem með einhverju móti geta haft áhrif á starfsemi eða rekstur TM. 

Regluvörslu TM er útvistað til Landsbankans.

Tryggingastærðfræði

Starfssvið tryggingastærðfræðings ber ábyrgð á útreikningi vátryggingaskuldar, tryggir notkun á viðeigandi forsendum, aðferðum og undirliggjandi líkönum við útreikning á vátryggingaskuld, metur gæði gagna sem notuð eru við útreikning á vátryggingaskuld og hvort þau séu fullnægjandi, ber saman besta mat vátryggingaskuldar við reynslu, upplýsir stjórn hvort vátryggingaskuld sé áreiðanleg og viðeigandi og hefur umsjón með útreikningi á vátryggingaskuld þegar hún er reiknuð miðað við hvert tjónstilvik fyrir sig.

Þá gefur tryggingastærðfræðingur álit á áhættutöku félagsins vegna vátrygginga sem og á endurtryggingavernd félagsins og starfar með áhættustýringu, einkum við útreikning áhættu vegna gjaldþolskrafna og vegna eigin áhættu- og gjaldþolsmats.

Innri endurskoðun

Markmið innri endurskoðunar er að efla virkni og gæði innra eftirlits og áhættustýringar hjá félaginu ásamt því að styðja við góða stjórnarhætti með því að hafa reglubundið eftirlit með stöðu og framkvæmd þessara þátta.

Innri endurskoðun veitir óháða og hlutlæga staðfestingu og ráðgjöf sem ætlað er að vera virðisaukandi og bæta rekstur félagsins. Innri endurskoðun leggur mat á og bætir virkni áhættustýringar, eftirlitsaðferða og stjórnarhátta með kerfisbundnum og öguðum vinnubrögðum og styður þannig samstæðuna í heild í að ná markmiðum sínum.

Innri endurskoðandi skal starfa óháð rekstrareiningum félagsins og gæta hlutlægni í störfum sínum. Þeir sem sinna störfum innri endurskoðunar skulu ekki gegna öðrum störfum fyrir félagið nema tryggt sé að þau störf skerði ekki óhæði þeirra. Innri endurskoðandi tekur ekki þátt í daglegum rekstri og ákvarðanatöku félagsins.

Stjórn er upplýst um allar niðurstöður og ábendingar innri endurskoðunar og tekur ákvörðun um aðgerðir og sér um að þeim sé framfylgt.

Starfsemi innri endurskoðunar hjá TM er útvistað til Landsbankans.

Fjárfestingarráð

Fjárfestingarráð TM hefur það meginhlutverk að fylgjast með fjárfestingum félagsins, gæta hagsmuna þess og fjalla um ákvarðanir um fjárfestingar í samræmi við heimildir fjárfestingarstefnu félagsins.

Fjárfestingarráð skipa forstjóri, forstöðumaður fjárfestinga og framkvæmdastjóri fjármála og rekstrar. Forstöðumaður áhættustýringar situr fundi fjárfestingarráðs.

Fjárfestingarráð fylgist með þróun eignasafns félagsins með reglubundnum hætti, fylgist með að fjárfestingarstefnu félagsins sé framfylgt, gerir tillögur til stjórnar um breytingar á fjárfestingarstefnu ef ástæða þykir til, yfirfer tillögur að fjárfestingum með hliðsjón af væntri ávöxtun og áhættumati, ásamt því að kanna mögulega hagsmunaárekstra.

Fjárfestingarráð samþykkir fjárfestingar í samræmi við heimildir í fjárfestingarstefnu og vísar fjárfestingum áfram til stjórnar til samþykkis í samræmi við heimildir í fjárfestingarstefnu.

Öryggisnefnd

Öryggisnefnd hefur umsjón með helstu málefnum sem snerta öryggi félagsins. Nefndinni er falið að ganga úr skugga um að öryggismál, þ.m.t. rekstraröryggi tölvukerfa, raunlægt öryggi, vinnuvernd og öryggi persónuuplýsinga sé í samræmi við áhættustefnu og áhættuvilja stjórnar.

Nefndin ber ábyrgð á innleiðingu, útfærslu og framkvæmd rekstraröryggis TM.

Öryggisnefnd skipa framkvæmdastjóri fjármála og rekstrar, forstöðumaður áhættustýringar, öryggistrúnaðarmenn, öryggisverðir, ábyrgðarmaður útvistunar upplýsingatækni TM og upplýsingaöryggisstjóri Landsbankans.

Ytri endurskoðun

Endurskoðunarfélag TM er kosið á aðalfundi í samræmi við samþykktir félagsins. Á aðalfundi TM í apríl 2025 var PricewaterhouseCoopers ehf. kosið endurskoðunarfélag TM starfsárið 2025.

Samfélagsábyrgð

TM hefur um árabil haft sjálfbærni að leiðarljósi í rekstri félagsins og setti sér markmið til ársins 2030 þegar skrifað var undir yfirlýsingu Festu og Reykjavíkurborgar um loftslagsmál.

Sem vátryggjandi er TM mjög meðvitað um þá þróun sem hefur orðið í veðurtengdum atburðum sem aukist hafa verulega hvað varðar tíðni og alvarleika á undanförnum árum. Þetta hefur m.a. leitt til harðnandi endurtryggingamarkaða, sérstaklega varðandi eignatryggingar.

TM hefur um árabil mælt árangur í þáttum sem snúa að umhverfis-, félagslegum- og stjórnarháttum (UFS) og hefur nýtt viðmið frá Nasdaq í skýrslugjöf. Eftir kaup Landsbankans á félaginu á árinu 2025 var ákveðið að vinna þessar mælingar á samstæðugrunni. Jafnframt hefur TM sótt um aðild að UN Global Compact, en Landsbankinn hefur um árabil verið meðlimur í samstökunum.

TM hefur innleitt sjálfbærniáhættustefnu sem útlistar leiðbeiningar og meginreglur um stjórnun sjálfbærniáhættu innan TM. Markmið stefnunnar er að draga úr og stýra áhættu, sem og styðja við sjálfbæra þróun. Tekið hefur verið upp UFS áhættumat í viðskiptum við fyrirtæki sem hafa 50 starfsmenn eða fleiri og er það fellt inn í almennt áhættumat við töku vátrygginga. Jafnframt hefur TM ákveðið að lágmarka neikvæð umhverfisáhrif af tjónaúrgangi. TM hefur í áratugi unnið að endurnýtingu tjónamuna og sett hafa verið sérstök ákvæði í samninga við aðila sem sjá um viðgerðir og frágang úrgangs eftir tjónsatburði.

Fjárfestingar eru mikilvægur þáttur í starfsemi TM og annað megin tekjusvið félagsins. Áhersla hefur verið lögð á mat á fjárfestingasafni TM samkvæmt PCAF aðferðarfræði, auk þess sem innleitt hefur verið mat á sjálfbærni sem hluti af áhættumati við nýjar fjárfestingar.

TM hefur stuðlað að því vekja athygli viðskiptavina á sjálfbærnimálum og hefur m.a. veitt árlega viðurkenningu, Svifölduna, fyrir nýsköpun á Sjávarútvegsráðstefnunni.

TM hefur fengið aðild að PSI (Principles for Sustainable Insurance) sem er sjálfbærnirammi á vegum Sameinuðu Þjóðanna. Um er að ræða grunngildi sem TM undirgengst og lúta að því að innleiða sjálfbærni í öllum þáttum rekstursins og vinna með viðskiptavinum og birgjum að lausnum á því sviði. TM skilaði í fyrsta sinn á árinu skýrslu um árangur í innleiðingu gildanna til samtakanna.

Nánari upplýsingar um sjálfbærni og ófjárhagslegar upplýsingar félagsins má finna í sjálfbærniskýrslu Landsbankans. Í viðauka samstæðureiknings TM er að finna lykilárangursmælikvarða félagsins samkvæmt flokkunarreglugerð ESB.

Aðgerðir gegn mútum og spillingu

Stjórn TM hefur staðfest siðareglur, sem er ætlað að gera grein fyrir þeim siðferðislegu gildum sem stuðst er við í daglegum störfum félagsins. Reglurnar eru grunnviðmið góðra viðskiptahátta og ber starfsmönnum að hafa þær að leiðarljósi í samskiptum sínum við viðskiptavini og aðra aðila í gegnum störf sín.

Reglunum er ætlað að tryggja öryggi og hagsmuni viðskiptavina og annarra sem eiga hagsmuna að gæta í samskiptum sínum og störfum fyrir félagið. Enn fremur er tilgangur reglnanna að tryggja gott starfsumhverfi og stuðla að góðum starfsháttum. Reglunum er jafnframt ætlað að draga úr áhættu, einkum rekstrar- og orðsporsáhættu.

TM hefur jafnframt innleitt reglur og verkferil við tilkynningar starfsmanna um brot á lögum eða ámælisverða háttsemi í starfsemi félagsins. Markmiðið með reglunum er að stuðla að því að upplýst verði um lögbrot eða aðra ámælisverða háttsemi í starfsemi TM og þannig dregið úr slíku hátterni.

Í undirbúningi er að innleiða siðareglur birgja líkt og Landsbankinn og verður það gert þegar aðild TM að UN Global Compact liggur fyrir.

Brot á lögum eða reglum, dómar og stjórnvaldsúrskurðir

TM hefur ekki hlotið dóma fyrir refsiverðan verknað skv. almennum hegningarlögum, samkeppnislögum, lögum um vátryggingastarfsemi eða löggjöf um hlutafélög, bókhald, ársreikninga, gjaldþrot eða opinber gjöld eða þeim sérlögum sem gilda um aðila sem lúta opinberu eftirliti með vátryggingastarfsemi.

Engar ákvarðanir eftirlits- eða úrskurðaraðila um brot á lögum eða reglum hafa á árinu 2025 varðað starfsemi félagsins.